दार्चुलाको गौरवको सडक आठ वर्षदेखि अलपत्र

काठमाडौं। सुदूरपश्चिम प्रदेश सरकारको गौरवको योजनाका रूपमा रहेको दार्चुलाको खलङ्गा-खार-देथला-पारिबगड सडकखण्ड निर्माण सुरु भएको आठ वर्ष बितिसक्दा पनि सम्पन्न हुन सकेको छैन। आर्थिक वर्ष २०७५/७६ मा सुरु गरिएको ९५ किलोमिटर लामो यो सडक बजेट अभाव र प्राकृतिक प्रकोपका कारण अलपत्र परेको हो। पूर्वाधार विकास कार्यालय, बैतडीका इन्जिनियर जितेन्द्रसिंह धामीका अनुसार २०७९ भदौमा गराकुखोलामा आएको भीषण बाढीले खलङ्गा क्षेत्रको सात किलोमिटर सडकमा ठूलो क्षति पुर्‍याएको थियो। हाल यस सडकको १९ करोड रुपियाँको लागतमा आठ किलोमिटर खण्डमा कालोपत्रे पूर्वको कार्य भइरहेको छ। प्रदेश सरकारले थप निर्माणका लागि तीन करोड ५० लाख रुपियाँ विनियोजन गरेको छ। सडकको दुरवस्थाका कारण स्थानीय बासिन्दा जोखिमपूर्ण यात्रा गर्न बाध्य छन्। यातायात व्यवसायी हरकसिंह नगालका अनुसार खलङ्गादेखि दल्लेखसम्मको १६ किलोमिटर खण्डमा बर्खायाममा हिलो र खाल्टाखुल्टीका कारण सवारी चलाउन निकै कठिन हुने गरेको छ। यसले गर्दा बिरामीलाई अस्पताल पुर्‍याउन र किसानलाई कृषि उपज बजारसम्म लैजान समस्या भइरहेको छ। यसैबीच, सडकको स्तरोन्नति गर्न महाकाली नगरपालिका र नौगाड गाउँपालिकाले संयुक्त रूपमा पहल सुरु गरेका छन्। दुवै पालिकाका प्रमुखहरूले मैखोलीदेखि दल्लेखसम्मको करिब तीन किलोमिटर सडक स्तरोन्नति गर्ने सहमतिपत्रमा हस्ताक्षर गरेका छन्। नौगाड गाउँपालिकाका अध्यक्ष दलजितसिंह धामीका अनुसार यस कार्यमा लाग्ने खर्च दुवै पालिकाले ५०/५० प्रतिशत व्यहोर्ने सहमति भएको छ।