दसैँमा मासु खाँदा अपनाउनुहोस् सावधानी: कति खाने र कसरी पकाउने?

काठमाडौं। दसैँको समयमा नेपाली भान्सामा मासुका विभिन्न परिकार पाक्ने गर्छन्। मासु प्रोटिन, खनिज तत्व, भिटामिन बी, जिंक र पोटासियमको राम्रो स्रोत भए पनि यसको अत्यधिक र असन्तुलित उपभोगले स्वास्थ्यमा गम्भीर असर पार्न सक्छ। पोषणविद् रुजु खड्काका अनुसार मासुलाई सही ढंगले नपकाउँदा र धेरै खाँदा पाचन प्रणालीमा समस्या, टाउको दुख्ने, वाकवाकी लाग्ने र पखाला लाग्ने जस्ता समस्या देखिन सक्छन्। लामो समयसम्म मासु सञ्चित गरेर तताउँदै खाने वा सुकुटी बनाएर राख्ने चलनले मासुको पोषक तत्व नष्ट हुनुका साथै स्वास्थ्यमा प्रतिकूल असर पार्छ। पोषणविद् खड्काका अनुसार विश्व स्वास्थ्य संगठनले एक हप्तामा ४३० ग्राम मासु खान सुझाव दिएको छ। बालबालिकाले दैनिक ४० देखि ६० ग्राम र वयस्कले १२० ग्रामसम्म मासु खान सक्ने उनको भनाइ छ। १८ वर्षभन्दा कम उमेरका बालबालिकाले रातो मासु खान मिल्ने भए पनि ५० वर्षभन्दा माथिका व्यक्तिले भने रातो मासुबाट टाढै रहनु उचित हुन्छ। ज्येष्ठ नागरिकको पाचनशक्ति कमजोर हुने र मुटुरोगको जोखिम बढी हुने भएकाले उनीहरूले चिल्लो कम भएको मासु खानुपर्छ। उच्च रक्तचाप, मधुमेह र युरिक एसिडका बिरामीले मासु खाँदा विशेष सचेत हुनुपर्छ। यस्ता व्यक्तिले रातो मासु नखाई नुनको मात्रा कम गरेर खानुपर्ने खड्काको सुझाव छ। मासु पकाउँदा धेरै तेल र मसलाको प्रयोग गर्नुको साटो पोलेर वा डढाएर पकाउनु हुँदैन। पोलेको मासु पेटको क्यान्सरको मुख्य कारण मानिन्छ। मासुसँगै हरियो सागसब्जी, सलाद र फलफूल मिसाएर सन्तुलित आहार बनाउनु स्वास्थ्यका लागि हितकर हुन्छ। मासु नखाने व्यक्तिले प्रोटिनको मात्रा पूरा गर्न भटमास, चना, सोयाबिन, दूध, दही, पनिर, बदाम र पेस्ता जस्ता खानेकुरा खान सक्ने पोषणविद् खड्का बताउँछिन्।