दसैँ मनाउन घर फर्किनेको घुइँचो, साढे ४ लाख यात्रुले छाडे उपत्यका

काठमाडौँ। बडादसैँ नजिकिएसँगै काठमाडौँ उपत्यका छाडेर घर फर्किने यात्रुको चाप ह्वात्तै बढेको छ। रोजगारी, अध्ययन र विभिन्न पेसा-व्यवसायका लागि राजधानीमा बस्दै आएका मानिसहरू दसैँ मनाउन गाउँ फर्कन थालेका हुन्। काठमाडौँ उपत्यका ट्राफिक कार्यालयका प्रवक्ता तथा प्रहरी उपरीक्षक नरेशराज सुवेदीका अनुसार घटस्थापनादेखि असोज ३० गतेसम्म चार लाख २३ हजार ६६४ यात्रुले उपत्यका छाडिसकेका छन्। विशेषगरी नयाँ बसपार्क, माछापोखरी, कलङ्की, बल्खु, कोटेश्वर र गौशाला क्षेत्रमा यात्रुको भीड बढेको छ। ट्राफिक प्रहरीले यी नाकाहरूमा सवारी व्यवस्थापनलाई सहज बनाइरहेको सुवेदीले जानकारी दिए। यात्रुहरू फर्पिङ, नागढुङ्गा, थानकोट, भीमढुङ्गा, तीनपिप्ले, साँखु, जगाती र भट्टेडाँडा नाका हुँदै बाहिरिरहेका छन्। पछिल्लो छ दिनको तथ्याङ्क अनुसार असोज २५ गते ५२ हजार ८२७, २६ गते ५६ हजार ८०९, २७ गते ७८ हजार १३८, २८ गते ७४ हजार ९७९, २९ गते ८५ हजार ५६१ र ३० गते ७५ हजार ३५० यात्रु बाहिरिएका छन्। यातायात व्यवसायीले पनि दसैँका लागि बसको व्यवस्थापन गरिरहेका छन्। नेपाल यातायात व्यवसायी राष्ट्रिय महासङ्घका महासचिव डेकनाथ गौतमले सडकको अवस्थाका कारण केही समस्या देखिए पनि सम्बन्धित निकायसँगको समन्वयमा यात्रुलाई सेवा दिइरहेको बताए। महासङ्घले यात्रुहरूलाई टिकट काटेर मात्र यात्रा गर्न, तोकिएको भाडा दर तिर्न र सवारीसाधनको अवस्थाबारे सचेत रहन आग्रह गरेको छ।