दशैंको मौकामा सुनसरीमा एन्बुलेन्सबाट गाँजा तस्करी

काठमाडौं।बडादशैंको मौका छोपेर सुनसरी र सप्तरीमा गाँजा ओसापसारका घटना भएका छन्। प्रहरीका अनुसार दुहवी नगरपालिका–६ बुढीखोलाको किनारबाट ठूलो परिमाणमा गाँजा बरामद गरिएको छ। प्रहरीले उक्त स्थानबाट ५७४.८७० किलो गाँजा बरामद गरेको छ। आइतबार राति इलाका प्रहरी कार्यालय दुहवीबाट खटिएको प्रहरी टोलीले उक्त स्थानमा रहेको ना४च ६०६३ नम्बरको एम्बुलेन्समा चेकजाँच गरेको थियो। उक्त एम्बुलेन्समा १७ वटा पोकामा रहेको उक्त परिमाणको गाँजा बरामद गरिएको कोशी प्रदेश प्रहरी प्रमुख प्रहरी नायब महानिरीक्षक (डीआईजी) शेखर खनालले बताए। उनका अनुसार एम्बुलेन्स चालक फरार छन्। उनको खोजी भइरहेको छ। यस्तै, प्रहरीले सप्तरीको बलान बिहुल गाउँपालिका–६ मौवहा पुवारी टोल नजिकै सडकबाट गाँजा बरामद गरेको छ। उक्त स्थानबाट ७२.५०५ किलो गाँजासहित दुई जना पक्राउ परेका छन्। पक्राउ पर्नेमा सिराहा भगवापुर गाउँपालिका–४ कल्याणपुरका ४८ वर्षीय रामनारायण ठाकुर र सोही गाउँपालिका–१ का ३७ वर्षीय मनोजकुमार मण्डल रहेका छन्। इलाका प्रहरी कार्यालय कडरबोनाबाट खटिएको प्रहरीले उनीहरूलाई उक्त गाँजासहित पक्राउ गरेको हो। धनकुटामा र उदयपुरमा खेती गरिएको गाँजा सप्तरी र सुनसरीका विभिन्न नाका हुँदै भारत तस्करी हुने गरेको छ। प्रहरीका अनुसार बिहार राज्यका विभिन्न जिल्लामा सुनसरी र उदयपुरबाट गाँजा तस्करी गर्ने समूह सक्रिय छ।