ट्रम्पले भने– भारतसँगको व्यापार सम्झौता निकै नजिक

काठमाडौं । अमेरिकी राष्ट्रपति डोनाल्ड ट्रम्पले भारत र अमेरिकाबीचको व्यापार सम्झौता अन्तिम रूप दिने चरणमा पुगेको बताएका छन् । मङ्गलबार ह्वाइट हाउसको ओभल अफिसमा पत्रकारहरूसँग कुरा गर्दै ट्रम्पले दुवै देश सम्झौता गर्न इच्छुक रहेको बताए। भारत–अमेरिका व्यापार सम्झौतासम्बन्धी प्रश्नमा उनले भने, ‘भारत सम्झौता गर्न चाहन्छ । हामी पनि सम्झौता गर्नेछौँ । हामी सम्झौताको निकै नजिक छौँ ।’ ट्रम्पले दुई देशबीच हुने सम्झौता यसअघि गरिएका सम्झौताभन्दा पूर्ण रूपमा फरक हुनेसमेत बताए। अमेरिकी विदेशमन्त्री मार्को रुबियो भारत भ्रमणमा रहेका बेला ट्रम्पको यस्तो भनाइ आएको हो । यसै महिनाको सुरुआतमा भारतका वाणिज्यमन्त्री पीयूष गोयलले अमेरिकी व्यापार प्रतिनिधि जेमिसन ग्रियरसँग भेटवार्ता गरेका थिए। उक्त भेटमा प्रस्तावित व्यापार सम्झौताका विभिन्न पक्षबारे छलफल भएको थियो । भारत र अमेरिकाले गत फेब्रुअरीमा द्विपक्षीय व्यापार सम्झौताको पहिलो चरणका लागि रूपरेखा अन्तिम रूप दिने घोषणा गरेका थिए । यद्यपि, त्यसपछि अमेरिकाको कर (ट्यारिफ) नीतिमा विभिन्न परिवर्तन भएका छन् । दुई देशबीचको प्रस्तावित सम्झौताले द्विपक्षीय व्यापार र आर्थिक सम्बन्धलाई थप प्रभाव पार्ने अपेक्षा गरिएको छ ।