जुम्लामा पहिलोपटक ‘सीमान्त साहित्य सम्मेलन’ आयोजना

जुम्ला । जुम्लामा पहिलोपटक ‘सीमान्त साहित्य सम्मेलन’ आयोजना गरिएको छ । आयोजक कुटीरो रिसर्च सेन्टरका अनुसार कला, साहित्य र संस्कृतिको संरक्षण तथा प्रवद्र्धन गर्ने उद्देश्यका साथ सोमबार जुम्ला एयरपोर्टस्थित होटल कान्जिरुवामा आयोजित एकदिने सम्मेलन गरिएकाे हाे । सम्मेलनको पहिलो संस्करणको उद्घाटन कर्णाली प्रदेश सरकारका आर्थिक मामिला तथा योजनामन्त्री टेकराज पछाईंले गरेका छन्। सम्मेलनमा देशका विभिन्न जिल्लाबाट साहित्यकार, स्रष्टा, कलाकार, अनुसन्धानकर्ता तथा साहित्यप्रेमीहरूको उल्लेखनीय सहभागिता रहेको छ । सम्मेलनमार्फत सीमान्त समुदायका सिर्जना, भाषा, साहित्य, संस्कृति तथा पहिचानलाई राष्ट्रिय स्तरमा प्रवद्र्धन गर्ने लक्ष्य राखिएको आयोजकले जनाएको छ । सम्मेलनमा साहित्यिक बहस, कविता वाचन, पुस्तक विमोचन, सांस्कृतिक प्रस्तुति, अनुभव आदान–प्रदान तथा सिर्जनात्मक अन्तरक्रियालगायत विविध कार्यक्रम सञ्चालन भइरहेका छन् । कुटीरो रिसर्च सेन्टर, जुम्लाले साहित्य, कला र संस्कृतिप्रति चासो राख्ने सम्पूर्ण सरोकारवाला तथा साहित्यप्रेमीलाई होटल कान्जिरुवा, जुम्लामा सञ्चालन भइरहेको सम्मेलनमा सहभागी भई कार्यक्रमको गरिमा बढाइदिन आग्रह गरेको छ ।