जनकपुरविरुद्ध कर्णालीको सुखद् सुरुआत

काठमाडौं । तेस्रो संस्करणको नेपाल प्रिमियर लिग (एनपिएल) मा कर्णाली याक्सले विजयी सुरुवात गरेको छ । कर्णालीले दिएको १३३ रनको लक्ष्य पछ्याएको जनकपुर बोल्ट्स १९.३ ओभरमा ११३ रनमा समेटिएपछि कर्णालीले १९ रनको जित निकालेको हो । जनकपुरका लागि अभिषेक तिवारीले सर्वाधिक २० रन बनाउनुभयो । कप्तान हर्मीत सिंह र मोइन अलीले समान १९ रन जोड्दा जिम्मी निशमले १५ तथा मायन यादवले १४ रन बनाउनुभयो । अनिलकुमार शाहले ११ र कुशल परेवा ६ रनमा आउट हुनुभयो । तृतराज दासले एक रन बनाउनुभयो । आदित्य मेहता खाता नखोली आउट हुँदा ललित राजवंशीले एक रन जोड्नुभयो । राहुल यादव एक रनमा अविजित रहनुभयो । कर्णालीको जितमा युनिस ठकुरी र हुसेन तलतले समान तीन विकेट लिनुभयो । युनिसले चार ओभरमा एक मेडन राख्दै तीन विकेट लिनुभएको थियो । उहाँले एउटै ओभरमा जनकपुरका कप्तान हर्मीत सिंह र जिम्मी निशमलाई आउट गर्दै खेलमा कर्णालीको पकड बलियो बनाउनुभएको थियो । नन्दन यादवले दुई तथा कप्तान सोमपाल कामीले एक विकेट लिनुभयो । त्यसअघि त्रिवि क्रिकेट मैदानमा टस हारेर पहिले ब्याटिङ गरेको कर्णालीले निर्धारित २० ओभरमा नौ विकेट गुमाएर १३२ रन बनाएको थियो । कर्णालीका ओपनर अरिफुल इस्लामले सर्वाधिक ४३ रन बनाउनुभयो । उहाँले २९ बलमा चार चौका प्रहार गर्नुभयो । पवन सर्राफले ३७ बलमा ३७ रन जोड्दै अरिफुलसँग चौथो विकेटका लागि ४२ रनको साझेदारी गर्नुभयो । कर्णालीले सुरुवातदेखि नै नियमित विकेट गुमाएको थियो । पहिलो ओभरको अन्तिम बलमा मार्क वाट एक रन बनाएर आउट हुनुभयो । चार रनमै पहिलो विकेट गुमाएको कर्णालीले थप १४ रन जोड्दा दोस्रो विकेट गुमायो । जनकपुरका लागि डेब्यु गरेका राहुल यादवले पहिलो बलमै विकेट लिँदै दीपक डुम्रेलाई १३ रनमा आउट गराउनुभयो । ३७ रन हुँदा तेस्रो विकेट गुमाएको कर्णालीका हुसेन तलत तीन रनमा पभेलियन फर्किउनुभयो । त्यसपछि अरिफुल र पवनले इनिङ्स सम्हाल्ने प्रयास गर्नुभएको थियो । उहाँहरू आउट भएपछि कर्णालीको ब्याटिङ फेरि दबाबमा परेको थियो । अक्बर अलीले एक, सोमपाल कामीले एक र गुल्सन झाले १२ रन बनाउनुभयो । नन्दन यादव नौ रनमा आउट हुँदा युवराज खत्री र युनिस ठकुरी अविजित रहनुभयो । जनकपुरका कप्तान हर्मीत सिंहले तीन विकेट लिनुभयो । मोइन अली र राहुल यादवले समान दुई तथा ललित राजवंशीले एक विकेट हात पार्नुभयो । एनपिएलअन्तर्गत मंगलबार पोखरा एभेन्जर्स र सुदूरपश्चिम रोयल्सबीच प्रतिस्पर्धा हुनेछ । उक्त खेल साँझ ५ बजे सुरु हुनेछ । विराटनगरविरुद्ध चितवनको रोमाञ्चक जितयसअघि मंगलबार भएको पहिलो खेलमा चितवन राइनोज विजयी भएको छ । कीर्तिपुरस्थित त्रिवि क्रिकेट रंगशालामा चितवनले प्रस्तुत गरेको १५८ रनको लक्ष्य पछ्याएको विराटनगर १४९ रनमै समेटियो । विराटनगरलाई सस्तैमा रोक्न कमलसिंह ऐरीले चार विकेट लिनुभयो । कमलले चार ओभर बलिङ गर्दा २६ रन खर्चिनुभयो । रिजन ढकालले दुई, रञ्जीत कुमार, मौसम ढकाल, टम टेयलर र ड्यान मुस्लेले समान एक विकेट लिनुभयो । विराटनगरका निम्ति ओपनर इम्रान शेखले ३९ रन बनाउनुभयो । आन्द्रे रसेलले ३३ रनको योगदान गर्नुभयो । अर्का ओपनर लोकेश बमले २६, एञ्जेलो म्याथ्युजले १४, बसिर अहमदले १३ रन जोड्नुभयो । त्यसअघि, चितवनले विराटनगरविरुद्ध निर्धारित २० ओभरमा तीन विकेट गुमाएर १५७ रन बनाएको थियो । चितवनका निम्ति ओपनर डेविड मलानले ७० रनको अर्धशतकीय इनिङ खेल्नुभयो । उहाँले ५० बलमा समान पाँच चौका र छक्का प्रहार गर्नुभयो । उहाँले अर्का ओपनर देव खनालसँग ५८ रनको अर्धशतकीय साझेदारी गर्नुभयो । अविजित रहनुभएका रवि बोपाराले ३२, ड्यान मुस्लेले २९ र देव खनालले १२ रन जोड्नुभयो । विराटनगरका एञ्जेलो म्याथ्युज, आन्द्रे रसेल र चरिथ अशलंकाले समान एक विकेट लिनुभयो । खेलमा कप्तान सन्दीपले १७.३ ओभरमा डीआरएसको अपिल गर्नुभएको थियो । उक्त बलमा अम्पायरले नटआउटको संकेत गरेपछि उहाँले अपिल गर्नुभएको हो । तर, उहाँको अपिल सफल भएन । टीभी अम्पायरले पनि नटआउटको संकेत गर्दा चितवनका डानी मुस्लेको विकेट जोगिएको थियो । त्यसपछि चितवनले पनि डीआएरसको अपिल गरेको थियो । दोस्रो इनिङको ३.१ ओभरमा गरिएको उक्त अपिल पनि सफल भएन । यसबाट विराटनगरका लोकेश आउट हुनबाट जोगिनुभयो । जितसँगै चितवनले दुई अंक जोडेको छ । चितवनले अब दोस्रो खेल यही ३१ अक्टोबरमा लुम्बिनी लायन्सविरुद्ध खेल्नेछ । हारबाट प्रतियोगिताको सुरुआत गरेको विराटनगरले सोही दिन दुई सिजनको उपविजेता सुदूरपश्चिम रोयल्ससँग खेल्ने तालिका छ ।