काठमाडौं। प्रहरी महानिरीक्षक मनोजकुमार केसीले नजिकिँदै गरेका चाडपर्वलाई लक्षित गरी विशेष सुरक्षा योजना लागू गर्न र प्रहरीलाई थप सक्रिय बनाउन निर्देशन दिएका छन्। शुक्रबार नेपाल प्रहरी प्रधान कार्यालयबाट भर्चुअल माध्यममार्फत प्रहरी कर्मचारीहरूलाई सम्बोधन गर्दै उनले दीपावली, नेपाल संवत् र छठलगायतका पर्वमा हुन सक्ने आपराधिक गतिविधि रोक्न विशेष सतर्कता अपनाउनुपर्ने बताए। महानिरीक्षक केसीले चाडपर्वका बेला चोरी, लुटपाट र आपराधिक घटनाहरू नियन्त्रण गर्न प्रभावकारी रूपमा प्रहरी परिचालन गर्न निर्देशन दिएका छन्। उनले पटका तथा विस्फोटक पदार्थको कारोबारलाई कडाइका साथ नियन्त्रण गर्न र सामाजिक सद्भाव बिगार्ने खालका गतिविधिप्रति सचेत रहन प्रहरी अधिकारीहरूलाई आग्रह गरे। स्थानीय तह र सरोकारवाला निकायहरूसँग समन्वय गरी सुरक्षा योजना बनाउन उनले जोड दिएका छन्। साथै, प्रदेश तथा जिल्ला प्रहरी प्रमुखहरूलाई आफ्नो कार्यक्षेत्रको नियमित अनुगमन गर्न र देखिएका कमजोरीहरू समयमै सुधार गर्न निर्देशन दिए। उक्त भर्चुअल कार्यक्रममा प्रहरीका उच्च अधिकारीसहित सातै प्रदेशका प्रहरी कार्यालय, जिल्ला प्रहरी कार्यालय तथा मातहतका निकायका प्रमुख र प्रतिनिधिहरूको सहभागिता थियो।
चाडपर्वमा सुरक्षा व्यवस्था कडा पार्न आईजीपीको निर्देशन
Read Complete Original Article
Published originally on नेपालन्युज
