गुल्मीमा दर्शनार्थी सवार स्कारपियो दुर्घटना, ६ जनाको मृत्यु

गुल्मी । गुल्मीमा स्कारपियो गाडी दुर्घटना हुँदा ६ जनाको मृत्यु भएको छ भने तीन जना घाइते भएका छन्। मृत्यु हुनेमा चार जना पुरुष र दुई जना महिला रहेका छन्। कालीगण्डकी गाउँपालिका–२, दभौखानीमा सोमबार दिउँसो करिब ४ बजे दुर्घटना भएको हो। स्याङ्जाको वालिङबाट हिलेसिद्ध दर्शन गर्न आएका दर्शनार्थी सवार गाडी दुर्घटनामा परेको कालीगण्डकी गाउँपालिकाका अध्यक्ष वेदबहादुर थापाले जानकारी दिए। उनका अनुसार दुर्घटनामा पाँच जनाको घटनास्थलमै मृत्यु भएको थियो भने एक जनाको उद्धार गरी अस्पताल लैजाने क्रममा बाटोमै मृत्यु भएको हो। दुर्घटनामा घाइते भएका तीन जनाको कालीगण्डकी अस्पतालमा उपचार भइरहेको छ। मृतक र घाइतेको पहिचान भने खुल्न सकेको छैन। जिल्ला प्रहरी कार्यालय गुल्मीका प्रहरी नायब उपरीक्षक वीरेन्द्रवीर विश्वकर्माका अनुसार गण्डकी प्रदेश बी.एए ०२२० नम्बरको स्कारपियो गाडी अनियन्त्रित भएर दुर्घटना भएको हो। दुर्घटनापछि गाडी सडकबाट करिब २५० मिटर तल खसेको प्रहरीले जनाएको छ। दुर्घटनाको जानकारी पाएलगत्तै उद्धारका लागि प्रहरी टोली परिचालन गरिएको थियो। प्रहरी चौकी पुर्तिघाटबाट प्रहरी सहायक निरीक्षक बाबुराम श्रेष्ठको कमान्डमा छ जना, इलाका प्रहरी कार्यालय रिडीबाट प्रहरी निरीक्षक ज्ञानबहादुर माझीको कमान्डमा पाँच जना र जिल्ला प्रहरी कार्यालय गुल्मीबाट प्रहरी नायब उपरीक्षक विश्वकर्माको कमान्डमा १० जनाको टोली घटनास्थलमा खटिएको छ। दुर्घटनास्थल प्रहरी चौकी पुर्तिघाटबाट करिब ६ किलोमिटर दक्षिणमा पर्छ। दुर्घटनाबारे थप विवरण आउन बाँकी रहेको प्रहरीले जनाएको छ।