‘काठमाडौंलाई दौडिएर होइन, महसुस गरेर अपनत्व लिनुपर्छ’ : सुनिता डंगोल

काठमाडौं । काठमाडौं महानगरपालिकाकी कार्यवाहक प्रमुख सुनिता डंगोलले काठमाडौंका ऐतिहासिक गल्ली, मन्दिर र सम्पदा केवल भौतिक संरचना नभई यहाँको मौलिक जीवनशैली र पहिचान भएको बताएकी छन्। उनले काठमाडौंलाई केवल दौडिएर पार गर्ने नभई यसको संस्कृति, सम्पदा र जनजीवनलाई नजिकबाट महसुस गर्नुपर्नेमा जोड दिएकी छन्। काठमाडौं महानगरपालिकाले वसन्तपुर क्षेत्रबाट आयोजना गरेको १० किलोमिटर लामो ‘हेरिटेज रन’ लाई सम्बोधन गर्दै डंगोलले नागरिक, सम्पदा र संस्कृतिलाई केन्द्रमा राखेर महानगरले आफ्ना कार्यक्रम अघि बढाइरहेको बताइन्। उनका अनुसार काठमाडौंका मन्दिर, ऐतिहासिक गल्ली, भजन–कीर्तन, परम्परागत खानपान र बिहानको मौलिक वातावरणले सहरलाई जीवन्त बनाएको छ। पैदल हिँड्दा वा दौडिँदा सहरसँग आत्मीय सम्बन्ध स्थापित हुने उनको भनाइ छ। ‘हेरिटेज रन केवल दौड प्रतियोगिता होइन, काठमाडौंको संस्कृति, सम्पदा र जनजीवनसँग जोडिने अवसर हो। हाम्रो उद्देश्य दौडिनु मात्र नभई काठमाडौंलाई महसुस गर्नु र यसप्रति अपनत्व बढाउनु हो,’ डंगोलले भनिन्। हेरिटेज रनमा विभिन्न पुस्ताको उत्साहजनक सहभागिता देखिएको थियो। हजुरबुवा–हजुरआमादेखि नातिनातिनासम्म सहभागी भएको कार्यक्रममा ७५ वर्षका ज्येष्ठ नागरिकदेखि युवा तथा बालबालिकासम्मले १० किलोमिटर दूरी पूरा गरेका थिए।