कांग्रेसले बोलायो केन्द्रीय कार्यसमिति बैठक

काठमाडौं। नेपाली कांग्रेसले केन्द्रीय कार्यसमिति बैठक बोलाएको छ। महामन्त्री उदयशम्शेर राणाका अनुसार बैठक आइतबार दिउँसो २ बजेका लागि तय गरिएको छ। बैठकमा सञ्चारगृहमा प्रहरी प्रवेश गरी पत्रकार पक्राउ गरिएको घटना, पार्टीको आन्तरिक कार्यविभाजन र पूर्वसभापति शेरबहादुर देउवा पक्षले गर्न लागेको समानान्तर महाधिवेशनका विषयमा छलफल हुनेछ। समाचार संकलन तथा प्रकाशनको विषयलाई लिएर प्रहरीले सञ्चारगृहमा प्रवेश गरी पत्रकारलाई नियन्त्रणमा लिएको घटनाको कांग्रेसले यसअघि नै भत्सर्ना गरिसकेको छ। सो घटनाबारे बैठकबाट संस्थागत निर्णय लिने तयारी गरिएको छ। त्यसैगरी, गत असोजमा सम्पन्न १५औं महाधिवेशनबाट निर्वाचित कार्यसमितिका पदाधिकारी र सदस्यहरूको कार्यविभाजन गर्ने विषय पनि बैठकको कार्यसूचीमा छ। साथै, देउवा समूहले आगामी मंसिर २१ देखि २३ गतेसम्मका लागि अगाडि बढाएको समानान्तर अधिवेशनको विषयमा पनि बैठकले आवश्यक निर्णय गर्ने जनाइएको छ।