कम्बोडिया र क्यानडा पठाइदिने भन्दै ७० लाख ठगेको आरोपमा नोर्गेन र सुस्मिता पक्राउ

काठमाडौं । वैदेशिक रोजगारीमा आकर्षक तलबको प्रलोभन देखाउँदै विभिन्न देश पठाइदिने भन्दै ७० लाख रुपैयाँ ठगी गरेको आरोपमा एक महिला र एक पुरुष पक्राउ परेका छन्। पक्राउ पर्नेमा दोलखाको मेलुङ गाउँपालिका–६ घर भई काठमाडौं महानगरपालिका–१५ बस्ने २५ वर्षीय नोर्गेन मोक्तान र काभ्रेको चौँरीदेउराली गाउँपालिका–९ घर भई काठमाडौं महानगरपालिका–३२ बस्ने २४ वर्षीया सुस्मिता रसाइली रहेका छन्। प्रहरीले उनीहरूलाई हिजो पक्राउ गरेको हो। प्रहरीका अनुसार नोर्गेनले कम्बोडिया पठाइदिने भन्दै दुई जना पीडितबाट ४० लाख रुपैयाँ लिएका थिए। त्यस्तै, सुस्मिताले क्यानडा पठाइदिने भन्दै तीन जना पीडितबाट ३० लाख रुपैयाँ लिएको आरोप छ। रकम लिएपछि दुवै जना सम्पर्कविहीन भएपछि पीडितहरूले प्रहरीमा उजुरी दिएका थिए। सोही उजुरीका आधारमा काठमाडौं उपत्यका अपराध अनुसन्धान कार्यालय टेकूबाट खटिएको टोलीले नोर्गेनलाई ललितपुर महानगरपालिका–३ र सुस्मितालाई काठमाडौं महानगरपालिका–३२ बाट पक्राउ गरेको हो। पक्राउ परेका दुवै जनालाई आवश्यक अनुसन्धान तथा कारबाहीका लागि वैदेशिक रोजगार विभाग, ताहाचल काठमाडौं पठाइएको प्रहरीले जनाएको छ।