इनम सापकोटासँगको म्यासेज प्रकरणपछि तरंगित भएको सर्वोच्चमा आज फूलकोर्ट बैठक बस्दै

काठमाडौं । प्रधानन्यायाधीश डा. मनोज शर्माको नाम जोडिएको म्यासेज अनि न्यायाधीश हरि फुयाल र इनम सापकोटाबीच सम्पर्क भएको विवरण सार्वजनिक भएपछि बिहीबार तरंगित भएको सर्वोच्च अदालतको ‘फूलकोर्ट बैठक’ आज बस्दैछ । प्रधानन्यायाधीश शर्माले आफू निकटका केही न्यायाधीश र न्यायप्रशासनका उच्चपदस्थ अधिकारीहरूसँग छलफल गरेपछि न्यायाधीशहरूलाई शुक्रबार बिहान फूल कोर्ट(सबै न्यायाधीश सम्मिलित प्रशासनिक प्रकृतिको बैठक) बस्ने सूचना जारी भएको छ । त्यसको एजेण्डामा ‘समसामयिक विषयमा छलफल’ भन्ने उल्लेख छ । शुक्रबार प्रधानन्यायाधीश डा. शर्मा सहित अरु न्यायाधीशहरूले बैठक गर्नेछन् । सर्वोच्च अदालतको बरिष्ठतम न्यायाधीश सपना प्रधान मल्ल वैदेशिक भ्रमणका क्रममा बिदामा छिन् । बरिष्ठतम न्यायाधीशको अनुपस्थितिमा फूल कोर्टको बैठक हुन लागेको हो । कानून व्यवसायीहरूको छाता संगठन नेपाल बार एशोसिएसनले पनि बिहीबार विज्ञप्तिमार्फत नै घटनाको छानबिन हुनुपर्ने, न्यायिक नेतृत्व र अरु न्यायाधीशहरूको भूमिकाबारे अध्ययन गरी गल्ती भेटिए कारबाहीको प्रक्रिया अघि बढाउनुपर्ने माग गरेको छ । ‘यति संवेदनशील समाचार सार्वजनिक हुँदा समेत सर्वोच्च अदालतको संयन्त्र तुलनात्मक रुपमा मौन बस्यो । छलफलमा न्यायिक नेतृत्वको अग्रसरता देखिएन,’ सर्वोच्च अदालतका एक न्यायाधीशले भने, ‘शुक्रबारको बैठकमा यसबारे छलफल होला भन्ने अपेक्षा छ ।’