अनधिकृत एआई एजेन्टले अमेरिकी बैंक खातामा पहुँच पाइरहेको रिपोर्ट

एआई एजेन्टहरूले प्रयोगकर्ताको निर्देशनबिना नै काम गरिरहेका धेरै अमेरिकी बैंकका स्रोतहरुले बताएका छन्। एक्सिओसको रिपोर्टअनुसार, अनधिकृत तेस्रो पक्षका एआई एजेन्टले अमेरिकी बैंक खातामा पहुँच पाइरहेका छन्। केही एजेन्टले प्रयोगकर्ताको निर्देशनबिना नै काम गरेको देखिएको छ। यद्यपि, यो जानकारी विभिन्न बैंकका नाम नखुलाइएका स्रोतहरूले दिएका हुन्। म्युजजस्ता धेरै एआई एजेन्टले प्रयोगकर्ताको तर्फबाट काम गर्न उनीहरूको बैंक खातामा पहुँच पाउन सक्छन्। यो आफैँमा ठूलो सुरक्षा चुनौती हो, किनभने अधिकांश बैंकले खातामा प्रवेश गर्न प्रयोगकर्ता आफैँ उपस्थित भएर लगइन गर्नुपर्ने व्यवस्था गरेका छन्। यी एजेन्टले सामान किन्न वा खाताबीच पैसा सार्न थालेपछि समस्या झन् जटिल बन्न सक्छ। यसबाट ठगी र आर्थिक अपराधको जोखिम निकै बढ्न सक्छ। इन्ग्याजेटका अनुसार बैंकहरूले एआई एजेन्टहरूको गतिविधि निगरानी गर्दा उनीहरूले स्पष्ट अनुमति नलिई ग्राहक सेवा केन्द्रमा सम्पर्क गर्नेजस्ता काम गरेको पाएका छन्। यसले गर्दा मोर्गन स्ट्यान्ली, बैंक अफ अमेरिका, जेपीमर्गन र वेल्स फार्गोजस्ता बैंकले सम्भावित जोखिम नियन्त्रण गर्न छिटोछिटो परिवर्तन गरेका छन्। केही बैंकले तेस्रो पक्षका एआई एजेन्टलाई आफ्ना प्लेटफर्ममा पहुँच दिन रोकेका छन् भने अरूले निश्चित अवस्थामा प्रतिबन्ध लगाएका छन्। धेरै बैंकले एआई एजेन्टलाई खाताको विवरण हेर्न मात्र मिल्ने, तर कुनै परिवर्तन गर्न नमिल्ने व्यवस्था गर्ने प्रयास गरिरहेका छन्। चेजका एक प्रवक्ताले एक्सिओसलाई बताएअनुसार, ग्राहकले आफ्नो प्रयोगकर्ता नाम र पासवर्ड कसैलाई पनि दिनु हुँदैन। यसमा एआई एजेन्ट पनि पर्छन्। कम्पनीका प्रमुख कार्यकारी अधिकृत जेमी डाइमोनले पनि हालैको आम्दानीसम्बन्धी छलफलमा वित्तीय प्लेटफर्महरूमा हजारौँ अनियन्त्रित एआई एजेन्ट सक्रिय हुन सक्ने चेतावनी दिएका थिए। अहिलेसम्म एआईका कारण ठूलो आर्थिक क्षति भएका घटनाबारे धेरै समाचार आएका छैनन्। तर, एआई एजेन्टलाई आफ्नो बैंक खातामा काम गर्न दिनुअघि सावधानी अपनाउनु उचित हुन्छ। किनभने कुनै एजेन्टले गलत काम गरेमा आफ्नो पैसा फिर्ता पाउने सम्भावना निकै कम हुन सक्छ। अमेरिकी इलेक्ट्रोनिक फन्ड ट्रान्सफर ऐनजस्ता कानुनअनुसार, प्रयोगकर्ताले स्वेच्छाले एआईलाई आफ्नो खातामा पहुँच दिएको अवस्थामा बैंकले क्षतिपूर्ति दिनुपर्ने जिम्मेवारी नलिन सक्छन्। प्रयोगकर्ता आफैँले एआईलाई खाताको पहुँच दिएको हो भने त्यसलाई ठगी मानिने सम्भावना कम हुन्छ। त्यसैले एआई एजेन्टलाई बैंक खातामा पहुँच दिँदा सावधानी अपनाउनु आवश्यक छ। The post अनधिकृत एआई एजेन्टले अमेरिकी बैंक खातामा पहुँच पाइरहेको रिपोर्ट appeared first on Technology Khabar.