न्यायाधीश हत्या प्रकरणमा बाबु पक्राउ : २ थान पेस्तोल, ३ म्यागजिनसहित १५ राउन्ड गोली बरामद

सर्लाही– सर्वोच्च अदालतका तत्कालीन न्यायाधीश रणबहादुर बमको हत्या प्रकरणमा दोषी ठहर भई जन्मकैदको सजाय भोगिरहेका बाबु थापा पक्राउ परेका छन् । जेनजी आन्दोलनका क्रममा काठमाडौंको केन्द्रीय कारागारबाट फरार भएका थापालाई प्रहरीले बुधबार राति सर्लाहीको बागमती नगरपालिका–स्थित घरबाट पक्राउ गरेको हो । सर्लाहीका प्रहरी प्रमुख रविन्द्रनाथ पौडेलका अनुसार थापाको साथबाट दुई थान पेस्तोल, तीनवटा म्यागजिन र १५ राउन्ड गोली बरामद भएको छ । उनीविरुद्ध हातहतियार तथा खरखजाना सम्बन्धी कसुरमा सर्लाही जिल्ला अदालतमा मुद्दा प्रक्रिया अघि बढाइने प्रहरीले जनाएको छ । थापा गत भदौ २४ गते जेनजी आन्दोलनका क्रममा केन्द्रीय कारागार जगन्नाथदेवलबाट फरार भएका थिए । उनी नेपाल र भारतका विभिन्न स्थानमा लुकेर बस्दै आएको प्रहरीको भनाइ छ । यसअघि पनि लामो खोजीपछि २०७१ सालमा पक्राउ परेका थापा चुरेभावर राष्ट्रिय पार्टीका तत्कालीन उपाध्यक्ष थिए । न्यायाधीश रणबहादुर बमको २०६९ जेठ १८ गते ललितपुरस्थित यूएन पार्क क्षेत्रमा गोली हानी हत्या गरिएको थियो । पार्टीभित्रको नेतृत्व विवाद र सर्वोच्च अदालतको अन्तरिम आदेशलाई हत्याको पृष्ठभूमिसँग जोडिएको थियो । उक्त प्रकरणमा दोषी ठहर भएपछि थापा जन्मकैदको सजाय भोगिरहेका थिए ।