बक्सअफिसमा ‘बाः एक योद्धा’ अगाडि

काठमाडौं । असोज ९ गते एकसाथ प्रदर्शनमा आएका नेपाली चलचित्र ‘बाः एक योद्धा’ बक्सअफिसमा बलियो देखिएको छ । सुरुवाती दिनमा सुस्त देखिएको दिव्यदेव पन्त अभिनीत ‘बाः एक योद्धा’ले प्रदर्शनको १७ दिनमा तीन करोड रुपैयाँभन्दा बढी ग्रस कलेक्सन गरेको छ । चलचित्र विकास बोर्डले सोमबार सार्वजनिक गरेको बक्सअफिस रिपोर्टअनुसार, ‘बाः एक योद्धा’ले १७ दिनमा तीन करोड पाँच लाख २२ हजार ५०४ रुपैयाँ कमाएको छ । यस अवधिमा एक लाख सात हजार ५३३ दर्शकले चलचित्र हेरेका छन् । त्यस्तै, निखिल उप्रेतीको लेखन तथा निर्देशन रहेको चलचित्र ‘आचार्य’ले प्रदर्शनको अवधिमा एक करोड ६२ लाख २७ हजार ९६७ रुपैयाँ ग्रस कलेक्सन गरेको छ । चलचित्रलाई यो समयसम्म ५६ हजार १९९ दर्शकले हेरेका छन् । कमाइ र दर्शक संख्याका हिसाबले दुवै चलचित्रबीच उल्लेख्य अन्तर देखिएको छ । प्रदर्शनअघि राम्रो चर्चा बटुलेको ‘आचार्य’को व्यापार भने पछिल्लो साता सुस्ताएको छ । अघिल्लो सातासम्म एक करोड ५६ लाख ६७ हजार ५४६ रुपैयाँ ग्रस कलेक्सन गरेको चलचित्रले पछिल्लो साता करिब ६ लाख रुपैयाँ मात्रै कमाउन सकेको छ । यसले चलचित्रको पछिल्लो प्रदर्शन कमजोर बन्दै गएको संकेत गर्छ । एक्सन जनरामा निर्माण भएको ‘आचार्य’मा निखिल उप्रेतीसँगै पूर्णिका सिजापती, दीपजंग राणा र रोहित चौधरीलगायत कलाकारको अभिनय छ । यही चलचित्रबाट पूर्णिकाले अभिनेत्रीका रूपमा डेब्यु गर्नुभएको हो । लामो समयपछि निखिलको कमब्याकका रूपमा चर्चामा रहेको चलचित्रले सुरुवाती हाइपअनुसारको व्यापारलाई निरन्तरता दिन सकेको देखिँदैन । उता, हरि लम्सालको लेखन तथा निर्देशनमा बनेको ‘बाः एक योद्धा’ले पारिवारिक कथावस्तुका माध्यमबाट दर्शकको ध्यान तानेको छ । बुवाले सन्तानको भविष्य निर्माणका लागि गर्ने त्याग, समर्पण र संघर्षलाई केन्द्रमा राखेर चलचित्र निर्माण गरिएको हो । चलचित्रको कथा र पटकथा दुवै लम्सालले नै लेख्नुभएको हो । चलचित्रमा दिव्यदेव पन्तसँगै झरना थापा र सुहाना थापा मुख्य भूमिकामा हुनुहुन्छ । यस्तै, ‘पेन्सन पट्टा’ले राम्रो कमाइ गरिरहेको छ । भदौ २६ गतेदेखि प्रदर्शनमा आएको ‘पेन्सन पट्टा’ले आइतबारसम्म नौ करोड ८८ लाख ९२ हजार १८८ रूपैयाँ ग्रस कमाएको छ । चलचित्रका तीन लाख ४७ हजार ८८२ टिकट बिक्री भएका छन् । सोहीदिन प्रदर्शनमा आएको चलचित्र ‘बेहुली’को कमाइ भने तुलनात्मक रूपमा सुस्त देखिएको छ । चलचित्रले उक्त समयसम्म दुई करोड ९९ लाख ४० हजार ७२४ रुपैयाँ ग्रस कमाएको छ । यसका एक लाख ६ हजार ५४३ टिकट बिक्री भएका छन् । पछिल्लो समय प्रदर्शनमा आएका चलचित्र ‘चमेलीको पोइ’ र ‘चंगुल’को कमाइ भने कमजोर देखिएको छ । सार्वजनिक विवरणअनुसार ‘चमेलीको पोइ’ले पाँच लाख ५० हजार २१० रुपैयाँ र ‘चंगुल’ले एक लाख ३८ हजार ३८० रुपैयाँ ग्रस कमाएको छ । लामो समयदेखि प्रदर्शनरत चलचित्र ‘गौंथली’को कमाइ २६ करोड दुई लाख नाघेको छ । साउन १ गतेदेखि प्रदर्शनमा आएको यो चलचित्रले हालसम्म २६ करोड दुई लाख ७० हजार ५९० रुपैयाँ ग्रस कमाएको हो । चलचित्रका नौ लाख ४४ हजार ६१२ टिकट बिक्री भएको विवरण उल्लेख छ । यस्तो छ नौ चलचित्रको ग्रस कमाइगौंथली : २६ करोड दुई लाख ७० हजार ५९० रुपैयाँ । पेन्सन पट्टा : नौ करोड ८८ लाख ९२ हजार १८८ रुपैयाँ । बा : एक योद्धा : तीन करोड पाँच लाख २२ हजार ५०२ रुपैयाँ । बेहुली : दुई करोड ९९ लाख ४० हजार ७२४ रुपैयाँ । आचार्य : एक करोड ६२ लाख २७ हजार ९४६ रुपैयाँ । झिंगेदाउ २ : एक करोड ४६ लाख १२ हजार ९१६ रुपैयाँ । तिमीहरू-एलिफेन्ट्स इन द फग : एक करोड ३१ लाख ६० हजार ५४५ रुपैयाँ । चमेलीको पोइ : पाँच लाख ५० हजार २१० रुपैयाँ । चंगुल : एक लाख ३८ हजार ३८० रुपैयाँ ।