मंगलबार विपद्का १६ घटना: १ जनाको मृत्यु, साढे ६ लाखको क्षति

काठमाडौं । विभिन्न प्रकृतिका १६ वटा विपद्का घटनामा परी मंगलबार एक जनाको मृत्यु भएको छ भने छ जना घाइते भएका छन्। विपद्का कारण आठ वटा चौपायामा क्षति पुगेको छ भने करिब छ लाख ४६ हजार रुपैयाँ बराबरको नोक्सानी भएको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार देशका विभिन्न स्थानमा आगलागी, सर्पदंश, पहिरो तथा जनावरको आक्रमणलगायतका विपद्का घटना घटेका हुन्। प्राधिकरणका प्रवक्ता शान्ति महतका अनुसार तेह्रथुम, रौतहट, सिन्धुपाल्चोक, काठमाडौँ, नवलपरासी पूर्व, रोल्पा र कञ्चनपुरमा आगलागीका घटना भएका छन् । यस्तै, मोरङ, डोल्पा, कैलाली र कञ्चनपुरमा सर्पदंशका घटना भएका छन् भने मुगुमा पहिरो गएको छ। यसैगरी, सोलुखुम्बु, सप्तरी र रौतहटमा जनावरको आक्रमणका घटना भएका छन् । विपद्का कारण मानवीय क्षतिसँगै पशुचौपाया र भौतिक सम्पत्तिमा क्षति पुगेको प्राधिकरणले जनाएको छ। आगलागी, पहिरो तथा अन्य विपद्बाट भएको क्षतिको विवरण सङ्कलन र व्यवस्थापनका लागि सम्बन्धित निकाय सक्रिय रहेको प्राधिकरणले जनाएको छ । मौसममा भइरहेको परिवर्तन तथा वर्षाजन्य विपद्को सम्भावित जोखिमलाई ध्यानमा राख्दै प्राधिकरणले सर्वसाधारणलाई सतर्कता अपनाउन आग्रह गरेको छ। सर्पदंशको जोखिम भएका क्षेत्रमा सावधानी अपनाउन, बाढीपहिरोको जोखिमयुक्त स्थानबाट टाढा रहन तथा विपद्का सङ्केत देखिएमा तत्काल सुरक्षित स्थानमा जान प्राधिकरणले अनुरोध गरेको छ। विपद्को जोखिम देखिएमा स्थानीय प्रशासन, सुरक्षा निकाय तथा सम्बन्धित निकायसँग समन्वय गर्न र आधिकारिक सूचनाको पालना गर्न प्राधिकरणले आग्रह गरेको छ।