ट्रम्प भन्छन्- पुटिनभन्दा जेलेन्स्कीसँग वार्ता गर्न कठिन

वासिङ्टन। अमेरिकी राष्ट्रपति डोनाल्ड ट्रम्पले रुसी राष्ट्रपति भ्लादिमिर पुटिनको तुलनामा युक्रेनी राष्ट्रपति भोलोदिमिर जेलेन्स्कीसँग वार्ता गर्न कठिन रहेको बताएका छन् । उनले जेलेन्स्कीमाथि शान्ति सम्झौताको कुरा गरे पनि निर्णय लिने बेला पछि हट्ने गरेको आरोप लगाउँदै युद्ध धेरै अघि नै अन्त्य हुनुपर्ने बताएका छन् । ट्रम्पका अनुसार, रुस र युक्रेन दुवैले युद्ध अन्त्य गर्ने विषयमा सोच्नुपर्ने भए पनि दुई देशका नेताबीचको गहिरो शत्रुताका कारण सहमतिमा पुग्न कठिन भइरहेको छ । उनले जेलेन्स्कीले सम्झौताका लागि तयार रहेको बताउने गरे पनि उनका गतिविधिले त्यसको विपरीत संकेत दिने गरेको आरोप लगाए । युक्रेनले रुसी तेल प्रशोधन केन्द्रहरूमाथि गरिरहेका आक्रमणप्रति पनि ट्रम्पले असन्तुष्टि जनाएका छन् । विश्वका विभिन्न क्षेत्रमा डिजेलको अभाव भइरहेका बेला रुसी तेल संरचनामाथिका आक्रमणले इन्धन बजारमा थप दबाब सिर्जना गर्न सक्ने उनको भनाइ छ । उनले जेलेन्स्कीलाई यस्ता आक्रमण नगर्न सुझाव दिनुपर्ने संकेतसमेत गरेका छन् । ट्रम्पले पूर्वराष्ट्रपति जो बाइडेनको कार्यकालमा युक्रेनले अर्बौं डलर बराबरको आर्थिक तथा सैन्य सहायता पाएको उल्लेख गर्दै पनि युद्ध अन्त्य हुन नसकेको टिप्पणी गरे । उनले जेलेन्स्कीमाथि आफ्नै देशलाई विनाशतर्फ धकेलेको आरोप लगाउँदै अन्ततः युक्रेन कुनै न कुनै सम्झौतामा पुग्नैपर्ने बताए । युद्धको पृष्ठभूमिबारे चर्चा गर्दै ट्रम्पले पूर्वराष्ट्रपति बराक ओबामाको कार्यकालमा क्रिमिया युक्रेनको नियन्त्रणबाट बाहिरिएको उल्लेख गरे । उनले क्रिमियाको भौगोलिक अवस्था र प्राकृतिक सौन्दर्यको प्रशंसा गर्दै त्यसलाई अत्यन्त मूल्यवान भूभाग बताए । रुसले सन् २०१४ मा क्रिमियामाथि कब्जा जमाएको थियो । युक्रेन र अधिकांश अन्तर्राष्ट्रिय समुदायले भने क्रिमियालाई युक्रेनकै भूभाग मान्दै आएका छन् । ट्रम्पले युद्धका सुरुआती दिनमा रुसी ट्यांकहरू तीव्र गतिमा किभतर्फ अघि बढेको तर खराब मौसम र हिलोका कारण उनीहरूको गति प्रभावित भएको बताए । उनले रुसी सेनाले ठूलो क्षति बेहोरेको उल्लेख गर्दै युक्रेनले पनि ठूलो सङ्ख्यामा सैनिक गुमाएको दाबी गरे । ट्रम्पका अनुसार रुसको ठूलो जनसंख्याका कारण उसले लामो समयसम्म मानवीय क्षति सहन सक्ने क्षमता राख्छ । उनले युद्ध छिट्टै अन्त्य हुने आशा व्यक्त गरे पनि शान्ति सम्झौताका लागि रुस र युक्रेन कुन सर्तमा सहमत हुन सक्छन् भन्ने विषय भने स्पष्ट पारेनन् ।