संखुवासभाको विकट हटियामा पुग्यो राष्ट्रिय प्रसारणलाइनको विद्युत्

काठमाडौं । नेपाल विद्युत् प्राधिकरणले संखुवासभाको उत्तरी भेगस्थित भोटखोला गाउँपालिका–३, हटियामा राष्ट्रिय प्रसारणलाइन विस्तार गरी विद्युत् आपूर्ति सुरु गरेको छ । प्राधिकरणको वितरण तथा ग्राहक सेवा निर्देशनालयअन्तर्गत योजना तथा प्राविधिक सेवा विभागमार्फत सञ्चालित आयोजनामार्फत हटिया क्षेत्रमा राष्ट्रिय प्रसारणलाइन विस्तार गरिएको हो । यसअघि उक्त क्षेत्रमा लघु जलविद्युत् योजनामार्फत विद्युत् आपूर्ति हुँदै आएको थियो । राष्ट्रिय प्रसारणलाइनबाट विद्युत् आपूर्ति सुरु भएपछि विकट तथा दुर्गम क्षेत्रको विद्युत् आपूर्ति थप भरपर्दो र पर्याप्त हुने अपेक्षा गरिएको छ । यसबाट स्थानीय बासिन्दा, सरकारी कार्यालय, स्वास्थ्य संस्था, कुटानीपिसानी मिल तथा घरेलु उद्योग लगायतका विद्युत् उपभोक्ताहरू प्रत्यक्ष रूपमा लाभान्वित हुनेछन् । खाँदबारी वितरण केन्द्रका प्रमुख रामबाबु चौधरीका अनुसार, भोटखोला गाउँपालिकाको कार्यालय र हाहियास्थित अस्पतालमा थ्री फेजका मिटर जडान गरी विद्युत् आपूर्ति सुरु गरिएको छ । राष्ट्रिय प्रसारणलाइन विस्तारले स्थानीय क्षेत्रमा विद्युत् आपूर्तिको उपलब्धता, नियमितता र विश्वसनीयता बढाउन सहयोग पुग्ने उनले बताए । चीनसँग सीमा जोडिएको भोटखोला गाउँपालिकाकै किमाथांकासम्म पनि राष्ट्रिय प्रसारणलाइन विस्तार गर्न प्राधिकरणले आवश्यक प्रक्रिया अगाडि बढाइसकेको छ । उक्त क्षेत्रसम्म विद्युत् पुर्‍याउन ठेक्का प्रक्रिया अघि बढिसकेको छ । चालु आर्थिक वर्षभित्रै किमाथांकामा राष्ट्रिय प्रसारणलाइनबाट विद्युत् आपूर्ति पुर्‍याउने लक्ष्य रहेको छ । संखुवासभामा विद्युत् पहुँच विस्तारलाई प्राथमिकता दिँदै प्राधिकरणले विकट तथा दुर्गम बस्तीहरूमा राष्ट्रिय प्रसारण प्रणाली विस्तार गर्ने कार्यलाई निरन्तरता दिइरहेको छ । जिल्लाका करिब ९५ प्रतिशत घरधुरीले राष्ट्रिय प्रसारणलाइनबाट विद्युत् उपभोग गरिरहेका छन् भने बाँकी घरधुरीमा लघु जलविद्युत् तथा सौर्य ऊर्जामार्फत विद्युत् आपूर्ति भइरहेको छ । दुर्गम तथा भौगोलिक रूपमा विकट बस्तीहरूमा राष्ट्रिय प्रसारणलाइन विस्तार गर्ने प्राधिकरणको प्रयासले स्थानीय जनताको जीवनस्तर सुधार, स्वास्थ्य तथा शिक्षा सेवाको प्रभावकारी सञ्चालन र स्थानीय आर्थिक गतिविधिको विस्तारमा योगदान पुर्‍याउने अपेक्षा गरिएको छ । The post संखुवासभाको विकट हटियामा पुग्यो राष्ट्रिय प्रसारणलाइनको विद्युत् appeared first on Corporate Khabar : Nepals First Corporate News Magazine and Portal.