चीन–ईयू व्यापार युद्ध टार्न वार्षिक तीन लाख ५० हजार गाडी आयात गर्ने सहमति

काठमाडौं । व्यापार युद्ध टार्न युरोपेली युनियन (ईयू) र चीनबीच चिनियाँ ‘हाइब्रिड’ गाडीको आयात सीमा तोक्ने सहमति भएको छ । योसँगै चीनबाट आयात गरिने हाइब्रिड गाडीको वार्षिक कोटा तीन लाख ५० हजार युनिट निर्धारण भएको ईयूका एक वरिष्ठ अधिकारीले बताएका छन् । यो कोटा सन् २०२७ देखि चार वर्षसम्म लागु हुनेछ । दोस्रो वर्षदेखि कोटामा वार्षिक ६ प्रतिशत वृद्धि गरिनेछ । यो व्यवस्थाले ईयूमा चिनियाँ गाडीको निर्यात आधाभन्दा बढीले घटाउनेछ । सन् २०२६ मा चीनबाट ईयूमा आठ लाख युनिटसम्म गाडी निर्यात हुने अनुमान गरिएको थियो । युरोपेली उपभोक्तामाझ हाइब्रिड गाडी लोकप्रिय छन् । कम मूल्यका कारण चिनियाँ कार निर्माता कम्पनीले युरोपेली बजारमा ठूलो हिस्सा ओगटेका छन् । ईयूले यसअघि सन् २०२४ मा चिनियाँ विद्युतीय गाडीमा अनुचित सरकारी अनुदान पाएको आरोप लगाउँदै अतिरिक्त महसुल लगाएको थियो । फ्रान्सेली राष्ट्रपति इम्यानुएल म्याक्रोनले नयाँ सम्झौताको स्वागत गर्दै यसले अनुचित प्रतिस्पर्धाबाट युरोपेली बजारलाई थप सुरक्षा दिने बताएका छन् । गएको साता तय भएको यो सम्झौता सन् २०२५ मा ईयूमा निर्यात गरिएका तीन लाख दुई हजार हाइब्रिड गाडीको तथ्यांकमा आधारित रहेको चिनियाँ वाणिज्य मन्त्रालयले जनाएको छ । चीनले यो व्यवस्थाले आफ्ना कम्पनीलाई निर्यातका निम्ति स्थिर वातावरण र क्रमिक वृद्धि सुनिश्चित गर्ने जनाएको छ ।