रास्वपाले सार्वजनिक गर्‍यो स्थानीय तह उम्मेदवार छनोट रूपरेखा

काठमाडौँ। राष्ट्रिय स्वतन्त्र पार्टी (रास्वपा) ले स्थानीय तह निर्वाचनका लागि उम्मेदवार छनोटसम्बन्धी रूपरेखा सार्वजनिक गरेको छ। पार्टीले सार्वजनिक गरेको उक्त रूपरेखामा उम्मेदवार छनोटको प्रक्रिया, विशेषाधिकारको प्रयोग र विशेष परिस्थितिको व्यवस्थालाई समेटिएको छ। नयाँ व्यवस्थाअनुसार पार्टी सचिवालयले तोकिएका पदहरूमा अधिकतम १५ प्रतिशतसम्म विशेषाधिकार प्रयोग गर्न सक्नेछ। यस्तो अधिकार गाउँपालिका, नगरपालिका र उपमहानगरपालिकाका प्रमुख, उपप्रमुख तथा वडा अध्यक्षका लागि लागू हुनेछ। त्यस्तै, महानगरपालिकाको हकमा वडा सदस्य, वडा अध्यक्ष, उपप्रमुख र प्रमुख पदका उम्मेदवार छनोटमा पनि सचिवालयले १५ प्रतिशतसम्म विशेषाधिकार प्रयोग गर्न सक्नेछ। यस्तो निर्णयका लागि केन्द्रीय समितिबाट अनुमोदन अनिवार्य गरिएको छ। निर्धारित विधि र प्रक्रियाभन्दा बाहिर गएर उम्मेदवार छनोट गर्नुपर्ने असाधारण परिस्थिति सिर्जना भएमा पार्टीले विशेष व्यवस्था गरेको छ। यस्तो अवस्थामा निर्णय लिनका लागि पार्टी केन्द्रीय समितिको तत्काल कायम रहेको सम्पूर्ण सदस्य सङ्ख्याको कम्तीमा दुई तिहाइ बहुमत आवश्यक पर्नेछ। उक्त असाधारण परिस्थितिमा पनि पार्टीको विधानअनुसार उम्मेदवार छनोटको अर्को प्रारूप अनिवार्य रहनेछ। यसका लागि पार्टी विधानको धारा ७(३), ६४ र ६५ अनुसार क्यान्डिडेट क्लब, लिडरसिप एकेडेमी र प्रारम्भिक निर्वाचनसम्बन्धी व्यवस्थालाई आधार मानिनेछ।