अलोकतान्त्रिक माध्यमबाट सरकार ढाल्ने प्रवृत्ति बढ्यो : अध्यक्ष ओली

काठमाडौं। नेकपा (एमाले) का अध्यक्ष केपी शर्मा ओलीले उत्पादन वृद्धि, रोजगारी सिर्जना र नागरिकको जीवनस्तर सुधारलाई राष्ट्रिय समृद्धिको मुख्य आधार बनाउनुपर्नेमा जोड दिएका छन्। बिहीबार पार्टीको नीति अध्ययन तथा अनुसन्धान प्रतिष्ठानको वेबसाइट सार्वजनिक गर्दै उनले राजनीतिक बहसहरू जनताको वास्तविक जीवनस्तर उठाउने दिशामा केन्द्रित हुनुपर्ने बताएका हुन्। अध्यक्ष ओलीले पार्टी र सरकारको मुख्य उद्देश्य गरिबी हटाउने र विपन्नतालाई दिगो समृद्धिमा रूपान्तरण गर्ने हुनुपर्ने उल्लेख गरे। उनले रोजगारीको मूल्य काम गरेको समयले नभई त्यसबाट प्राप्त हुने पर्याप्त आम्दानीले निर्धारण गर्ने स्पष्ट पारे। नागरिकलाई आर्थिक रूपमा सबल बनाउन परिवारका आधारभूत आवश्यकता पूरा गर्न सक्ने मर्यादित रोजगारी सिर्जना गर्नुपर्ने उनको भनाइ छ। मानवतावादलाई आफ्नो राजनीतिक र सामाजिक मान्यताको मूल आधार मान्दै ओलीले शिक्षा, स्वास्थ्य र आधारभूत आवश्यकता सहज बनाउनु राज्यको दायित्व भएको बताए। नीति निर्माण गर्दा परम्परागत शैलीभन्दा पनि अनुसन्धान र यथार्थ तथ्याङ्कका आधारमा निर्णय लिनुपर्ने उनले औँल्याए। वर्तमान विश्व व्यवस्थाबारे टिप्पणी गर्दै अध्यक्ष ओलीले अलोकतान्त्रिक, षड्यन्त्रकारी र पपुलिस्ट माध्यमबाट सरकार ढाल्ने र लोकप्रिय नेताहरूलाई बदनाम गर्ने प्रवृत्ति बढेको भन्दै सजग रहन चेतावनी दिए। उनले यस्ता अराजक प्रवृत्तिका विरुद्ध राजनीतिक रूपमा सतर्क रहनुपर्ने बताए। जलवायु सङ्कटबारे चर्चा गर्दै उनले रसुवाको भोटेकोशीमा आएको बाढीलाई हिमालय क्षेत्रमा भइरहेको गम्भीर सङ्कटको चेतावनीका रूपमा लिएका छन्। उनले हिमालयको पर्यावरण जोगाउन क्षेत्रीय सहकार्य र विश्वव्यापी पैरवी आवश्यक रहेको बताए। कार्यक्रममा डा. विष्णुराज उप्रेती, प्रा.डा. योगेन्द्रबहादुर गुरुङ, डा. नेत्रप्रसाद तिम्सिना र पूर्व अर्थमन्त्री डा. युवराज खतिवडाले नीतिगत अनुसन्धान, जनसांख्यिक लाभ, जलवायु विपद् र गरिबी निवारणका विषयमा आफ्ना धारणा राखेका थिए।