देउवाको साथ छोडेकामध्ये खतिवडा र शाही मात्रै पदाधिकारीमा निर्वाचित

काठमाडाैं । नेपाली कांग्रेसको १५औँ महाधिवेशनमा पूर्वसभापति शेरबहादुर देउवा समूह छाडेर संस्थापन पक्षमा फर्किएका नेताहरूमध्ये अहिलेसम्म दुई जना मात्रै पदाधिकारीमा निर्वाचित भएका छन् । असोज २ गते मात्रै देउवा समूह छाडेका रामहरि खतिवडा खुलातर्फको सहमहामन्त्रीमा सर्वाधिक २,९१९ मतसहित निर्वाचित भएका छन् । त्यस्तै, देउवाको साथ छोडेका जीवनबहादुर शाही पिछडिएको क्षेत्रबाट ३,९०६ मतसहित विजयी भएका छन् । देउवा समूह छाडेका अन्य थुप्रै शीर्ष नेताहरूले भने निर्वाचन जित्न सकेनन्। पूर्णबहादुर खड्का, बालकृष्ण खाण, ज्ञानेन्द्रबहादुर कार्की र मीनबहादुर विश्वकर्मा मध्ये कोही महाधिवेशन प्रक्रियामै सहभागी भएनन् भने सहभागी भएकाहरूले पनि जित निकाल्न सकेनन् । अहिले गगन थापा पक्षमा रहेका प्राय नेताहरु विशेष महाधिवेशन पछिसम्म समेत देउवाकै साथमा थिए । अहिले चुनाव जितेका खतिवडा र शाही पार्टीको विभाजन रोक्ने, वैधानिकता जोगाउने र राजनीतिक भविष्य सुरक्षित गर्ने रणनीतिका साथ देउवाको साथ छाडेको बताउँछन् । विशेष महाधिवेशनपछि कांग्रेस दुई धार गगन थापा नेतृत्वको संस्थापन पक्ष र देउवा नेतृत्वको इतर पक्षमा विभाजित भएको थियो । देउवा समूहले संस्थापन पक्षको महाधिवेशन बहिष्कार गरी डा. शशांक कोइरालालाई संयोजक तोकेर समानान्तर समिति र छुट्टै महाधिवेशनको प्रक्रिया अघि बढाएको छ । खतिवडा र शाही दुवै नेताहरू पार्टीभित्र पूर्णबहादुर खड्कानिकट मानिन्थे । खड्का आफैं पनि देउवा समूहले समानान्तर महाधिवेशन प्रक्रिया र चुनदेवीमा छुट्टै बैठकहरू अघि बढाएपछि पार्टी फुटको पक्षमा उभिन नसक्ने भन्दै देउवा समूहबाट टाढिएका थिए । सोही समूहका खतिवडा र शाहीले पनि पार्टी विभाजनको साक्षी बस्नुभन्दा मूलधारमै फर्किनु उपयुक्त ठानेर देउवाको साथ छोडेको बताएका थिए । गगन थापा नेतृत्वको संस्थापन पक्षले बोलाएको १५औँ महाधिवेशनले नै आधिकारिकता पाउने निश्चित जस्तै भएपछि राजनीतिक रूपमा सुरक्षित हुन उनीहरू निर्वाचनको मुखैमा देउवा पक्ष त्यागेर मूलधारको महाधिवेशन प्रक्रियामा सामेल भएका हुन् । नेता खतिवडाले अहिले मेरो गुट, तेरो गुट भनेर आन्तरिक लफडामा अल्झिने बेला नभएको भन्दै सबै नेताहरू एकताबद्ध भएर महाधिवेशनमा जानुपर्ने सार्वजनिक अभिव्यक्ति समेत दिएका थिए । देउवा समूहले लिएको समानान्तर र विद्रोही बाटोका कारण पार्टी कानुनी र व्यावहारिक रूपमा संकटमा पर्ने देखेपछि आफ्नो राजनीतिक भविष्य रक्षा र पार्टी एकताका लागि खतिवडा र शाही लगायतले महाधिवेशनको अन्तिम समयमा देउवाको साथ छोडेका थिए ।