‘आमाको माया’ बालकथा संग्रह लोकार्पण

जोरपाटी । अभिनव साहित्य समाजको २९७औं शृंखलाअन्तर्गत साहित्यिक कार्यक्रम, शुभकामना आदानप्रदान तथा कवि गोष्ठी आयोजना गरिएको छ । भैरव स्मृति भवन, जोरपाटीमा आयोजित कार्यक्रममा साहित्यकार गोविन्द घिमिरे वेदमणिद्वारा लिखित बालकथा संग्रह ‘आमाको माया’ लोकार्पण गरिएको हो । कार्यक्रममा सुसेलीका प्रतिपादक साहित्यकार दुर्गा अधिकारी प्रमुख अतिथि तथा अभिनव साहित्य समाजका उपाध्यक्ष विमल अर्याल सभापति रहनुभएको थियो । प्रमुख अतिथि अधिकारीले बालकथा संग्रह लोकार्पण गर्नुभएको थियो । कार्यक्रममा साहित्यकार दिलीप अर्यालले ‘आमाको माया’ बालकथा संग्रहबारे परिचयात्मक टिप्पणी प्रस्तुत गर्नुभएको थियो । उहाँले संग्रहको साहित्यिक पक्ष र बालसाहित्यमा यसको महत्त्वबारे चर्चा गर्नुभएको थियो । कार्यक्रमको अर्को आकर्षण कवि गोष्ठी थियो । गोष्ठीमा ३० जना कवि तथा कवयित्रीले आ-आफ्ना सिर्जना वाचन गरेका थिए । सहभागी स्रष्टाहरूले कविता तथा साहित्यिक रचनामार्फत आफ्ना भाव, विचार र अनुभूति प्रस्तुत गरेका थिए । वाचन गरिएका रचनामध्ये दिव्यलक्ष्मी पोखरेल र दुर्गा घिमिरेका सिर्जना उत्कृष्ट ठहरिनुभएको थियो । उहाँहरूलाई अभिनव साहित्य समाजले प्रोत्साहनस्वरूप पुरस्कार प्रदान गरेको थियो । कार्यक्रममा प्रमुख अतिथि दुर्गा अधिकारीले साहित्यिक गतिविधिले समाजलाई सकारात्मक दिशातर्फ अघि बढाउन महत्त्वपूर्ण भूमिका खेल्ने बताउनुभयो । साहित्यले समाजमा चेतना अभिवृद्धि गर्नुका साथै सिर्जनशीलता र सकारात्मक सोचको विकासमा सहयोग पुर्‍याउने उहाँको भनाइ थियो । उहाँले यस्ता साहित्यिक कार्यक्रम देशभरका नगरपालिका तथा गाउँपालिकामा नियमित रूपमा आयोजना गर्नुपर्नेमा जोड दिनुभयो । साहित्य र संस्कृतिको प्रवर्द्धनका लागि स्थानीय सरकारले पनि आवश्यक सहयोग र सहकार्य गर्नुपर्ने अधिकारीले बताउनुभयो । अभिनव साहित्य समाजले नियमित रूपमा आयोजना गर्दै आएको साहित्यिक शृंखलाले स्रष्टाहरूलाई आफ्ना सिर्जना प्रस्तुत गर्ने अवसर प्रदान गर्नुका साथै साहित्यिक गतिविधिलाई निरन्तरता दिन सहयोग पुर्‍याउँदै आएको छ । बालसाहित्यको प्रवर्द्धन, स्रष्टाहरूबीच आपसी परिचय तथा साहित्यिक विमर्शका दृष्टिले पनि कार्यक्रम महत्त्वपूर्ण रहेको सहभागीहरूको भनाइ थियो । कार्यक्रमको अन्त्यमा सभापति विमल अर्यालले उपस्थित अतिथि, साहित्यकार तथा सहभागी सबैलाई धन्यवाद व्यक्त गर्दै कार्यक्रम समापन गर्नुभएको थियो ।