ममाथि निर्मम छानबिन होस्, दोषी भए सजाय भोग्न तयार छुः खगेन्द्र सुनार

काठमाडौं । राष्ट्रिय स्वतन्त्र पार्टी (रास्वपा) का सांसद खगेन्द्र सुनारले आफूमाथि लागेका आरोपको निष्पक्ष र निर्मम छानबिन गर्न माग गर्दै दोषी प्रमाणित भए जस्तोसुकै सजाय भोग्न तयार रहेको बताएका छन्। सामाजिक सञ्जालमार्फत आफ्नो धारणा सार्वजनिक गर्दै सुनारले आरोप प्रमाणित भए प्रतिनिधिसभा सदस्य र पार्टीको केन्द्रीय सदस्य पदबाट निलम्बन वा बर्खास्त गर्नसमेत आग्रह गरेका छन्। उनले आफूमाथि उठेका प्रश्नको छानबिनमा पार्टी, सरकार र राज्यका सम्बन्धित निकायलाई सहयोग गर्ने प्रतिबद्धता जनाएका छन्। आफूले कुनै गलत काम गरेको प्रमाणित भए त्यसको जिम्मेवारी लिन तयार रहेको उनको भनाइ छ। सुनारले यस प्रकरणमा एक महिलामाथि भइरहेको भनिएको मिडिया ट्रायल, अतिरञ्जित प्रचार तथा तस्बिर, अडियो र भिडियो जोडेर गरिने टिप्पणीप्रति आपत्ति जनाएका छन्। विगतमा कसैले दुःख दिएको भन्ने आधारमा महिलालाई सार्वजनिक रूपमा लखेट्नु उचित नभएको उनले बताएका छन्। आफूमाथि लागेको आरोपको छानबिन हुनुपर्ने भए पनि त्यसका नाममा सम्बन्धित महिलामाथि प्रहरी, राज्य, समाज र सञ्चारमाध्यमबाट दुर्व्यवहार हुन नहुनेमा उनले जोड दिएका छन्। सुनारले प्रहरी प्रधान कार्यालय र केन्द्रीय अनुसन्धान ब्युरो (सीआईबी) बाट पटक–पटक बोलाइएको तथा मुद्दा दर्ता गर्न भनिएको विषय पनि उल्लेख गरेका छन्। उनका अनुसार ती महिलाले अन्याय भएको भए आफैँ कानुनी प्रक्रियामा जाने र आफ्नो जीवनबारे सचेत रहेको जवाफ दिएकी थिइन्। आफूले विगतमा विभिन्न विषयमा प्रश्न उठाएको वा मुद्दा अघि बढाएको कारण अहिले आफूमाथि प्रश्न गर्न नपाइने भन्ने नरहेको पनि सुनारले स्पष्ट पारेका छन्। समाचार सार्वजनिक भइसकेपछि आफूमाथि लागेका प्रत्येक आरोपको सत्यतथ्य छानबिन हुनुपर्ने उनको माग छ। ‘जे कारबाही हो, ममाथि होस्, मलाई स्वीकार छ। उहाँमाथिको आक्रमण मान्य छैन। त्यो गलत छ,’ सुनारले भनेका छन्। उनले आफूमाथि लागेका आरोपको निष्पक्ष अनुसन्धान गरी दोषी ठहरिए कानुनअनुसार कारबाही गर्न र यस प्रकरणमा सम्बन्धित महिलामाथि हुने भनिएको आक्रमण तथा दुर्व्यवहार रोक्न सम्बन्धित निकायसँग आग्रह गरेका छन्।