चाडपर्वमा उपहार र नगद लेनदेन नगर्न रास्वपाको अपिल

काठमाडौं। राष्ट्रिय स्वतन्त्र पार्टी (रास्वपा) ले बडादसैँ, तिहार, नेपाल संवत् र छठ पर्वको अवसरमा उपहार तथा नगद लेनदेन नगर्न आग्रह गरेको छ। पार्टीले शुभकामना आदानप्रदान गर्दा कुनै पनि प्रकारको उपहार, नगद, जिन्सी वा सुविधाको लेनदेनलाई निरुत्साहित गर्न अपिल गरेको हो। रास्वपाका महामन्त्री विपिन आचार्यले शुक्रबार एक विज्ञप्तिमार्फत स्वदेश तथा विदेशमा रहेका नेपालीहरूलाई चाडपर्वको शुभकामना दिँदै यस्तो आग्रह गरेका हुन्। उनले पार्टी स्थापनाकालदेखि नै यस्तो संस्कारलाई निरुत्साहित गर्दै आएको र यसलाई निरन्तरता दिने बताएका छन्। आचार्यले भनेका छन्, ‘चाडपर्वमा हामी जसरी परिवार र आफन्तबाट केवल आशीर्वादको अपेक्षा गर्छौँ, त्यसरी नै राजनीतिमा पनि हाम्रा लागि नागरिक र अन्य सबैको सद्भाव, आशीर्वाद र विश्वास नै सबैभन्दा ठूलो उपहार हो।’ चाडपर्वले निःस्वार्थ प्रेम र सद्भावको सन्देश दिने उल्लेख गर्दै आचार्यले मर्यादित, सुसंस्कृत र भरोसायोग्य राजनीतिक संस्कार निर्माणका लागि सबैको साथ र सहयोगको अपेक्षा गरेका छन्।