चिकित्सा शिक्षामा ४१८ सिट थपियो

काठमाडौं । चिकित्सा शिक्षामा चालु शैक्षिक सत्रका लागि ४१८ सिट थप गरिएको छ । शिक्षा मन्त्री सस्मित पोखरेलले थपिएका सबै सिट सरकारी शिक्षण संस्थालाई दिइएको बताएका छन् । थप सिटमध्ये एमबीबीएसतर्फ ११०, बीएससी नर्सिङतर्फ २१० र बीएमएसतर्फ ९८ सिट छन् । मन्त्री पोखरेलले शनिबार सामाजिक सञ्जालमार्फत यस वर्ष निजी कलेजको सिट संख्या यथावत् राखेर सरकारी शिक्षण संस्थामा मात्र सिट थप गरिएको जानकारी दिएका हुन् । जेहेन्दार विद्यार्थीले कम शुल्कमा सरकारी शिक्षण संस्थामै अध्ययन गर्ने अवसर पाऊन् भन्ने उद्देश्यले यस्तो निर्णय गरिएको उनको भनाइ छ ।सुदूरपश्चिमवासीको वर्षौंदेखिको सपना पूरा गर्दै गेटास्थित सहिद दशरथ चन्द स्वास्थ्य विज्ञान विश्वविद्यालयमा ५० सिटसहित एमबीबीएस पढाइ सुरु हुने मन्त्री पोखरेलले बताएका छन् । त्यस्तै, धरानस्थित बीपी कोइराला स्वास्थ्य विज्ञान प्रतिष्ठान र नेपाली सेना स्वास्थ्य विज्ञान प्रतिष्ठानमा एमबीबीएसतर्फ ३०–३० सिट थपिएको उनले जानकारी दिएका छन् । देशमै गुणस्तरीय चिकित्सा शिक्षाको पहुँच विस्तार गरी विद्यार्थीलाई आफ्नै देशमा चिकित्सक तथा नर्स बन्ने वातावरण बनाउन सरकार क्रियाशील रहेको मन्त्री पोखरेलले बताएका छन् ।