खाद्य व्यवस्था कम्पनीको सीईओका लागि तीन जनाको नाम सिफारिस

काठमाडौं । सरकारी स्वामित्वको खाद्य व्यवस्था तथा व्यापार कम्पनी लिमिटेडको प्रमुख कार्यकारी अधिकृत (सीईओ) पदका लागि तीन जनाको नाम सिफारिस गरिएको छ । उद्योग, वाणिज्य तथा आपूर्ति मन्त्रालयद्वारा गठित सिफारिस समितिले कार्ययोजना प्रस्तुतीकरण र मूल्यांकनका आधारमा उत्कृष्ट तीन जना उम्मेदवारको नाम छनोट गरेको हो । सिफारिसमा पर्नेमा तनहुँका डिल्लीराज लम्साल, सिरहाकी संगीता यादव र काठमाडौंका होमनाथ न्यौपाने रहेका छन् । समितिले गत असोज १७ र १८ गते सीईओ पदका लागि आवेदन दिएका १६ जना उम्मेदवारको अन्तर्वार्ता तथा कार्ययोजना प्रस्तुतीकरण लिएको थियो । सोही प्रक्रियाबाट प्राप्त अंकका आधारमा तीन जनाको नाम सिफारिस गरिएको हो । अब सिफारिस भएका तीन जनामध्येबाट मन्त्रिपरिषद्ले एक जनालाई कम्पनीको सीईओमा नियुक्त गर्ने कानुनी व्यवस्था छ । खाद्य व्यवस्था तथा व्यापार कम्पनीमा गत वैशाखको तेस्रो सातादेखि सीईओ पद रिक्त रहँदै आएको छ । सरकारले ल्याएको नयाँ अध्यादेशका कारण तत्कालीन सीईओ रमेश आचार्य कार्यकाल पूरा नहुँदै पदमुक्त भएपछि उक्त पद रिक्त भएको थियो ।