सरकारले विभिन्न निकायमा गर्‍यो ६११ जनाको नियुक्ति, ५ कम्पनी कालोसूचीमा

काठमाडौं । सरकारले सार्वजनिक पदाधिकारीको पदमुक्तिसम्बन्धी विशेष व्यवस्था अध्यादेश, २०८३ जारी भएयता विभिन्न सार्वजनिक निकायमा ६११ जनालाई नियुक्त गरेको छ। शुक्रबार सिंहदरबारस्थित प्रधानमन्त्री तथा मन्त्रिपरिषद्को कार्यालयमा आयोजित नियमित मिडिया ब्रिफिङमा प्रवक्ता सहसचिव हेमराज अर्यालले विभिन्न निकायमा भएको नियुक्तिबारे जानकारी दिएका हुन्। उनका अनुसार विभिन्न मन्त्रालय र मातहतका सार्वजनिक निकायमा पदाधिकारीको नियुक्ति खारेज भएपछि ८० वटा निकायमा ४१९ जनाको नियुक्ति तथा पदपूर्ति भएको छ। प्रधानमन्त्री तथा मन्त्रिपरिषद्को कार्यालयको प्रस्तावमा मन्त्रिपरिषद्बाट १४ जना तथा विश्वविद्यालय, आयोग र प्रतिष्ठानमा १७८ जनाको नियुक्ति भएको उनले बताए । त्यस्तै, राष्ट्रिय तथ्याङ्क कार्यालयले बालबालिकाको वैकल्पिक हेरचाहसम्बन्धी तथ्याङ्कलाई स्तरीय, एकरूप र अन्तर्राष्ट्रिय स्तरमा तुलनायोग्य बनाउन मस्यौदामा विभिन्न सुझाव दिएको प्रवक्ता अर्यालले जानकारी दिए । पछिल्लो साता बेरुजु फर्छ्यौट समन्वय तथा अनुगमनका लागि सिन्धुपाल्चोकस्थित कोष तथा लेखा नियन्त्रक कार्यालयको अनुगमन गरिएको पनि उनले बताए । सार्वजनिक खरिद अनुगमन कार्यालयको निर्णयअनुसार विभिन्न पाँचवटा फर्म तथा कम्पनीलाई कालोसूचीमा राखिएको छ। यसैबीच, प्रधानमन्त्री दैवी प्रकोप उद्धार कोषमा हालसम्म १७ अर्ब ९४ करोड ३१ लाख एक हजार ९६९ रुपैयाँ जम्मा भएको प्रधानमन्त्री तथा मन्त्रिपरिषद्को कार्यालयले जनाएको छ।