कांग्रेसको १५औँ महाधिवेशनको मतगणना सकियो

काठमाडौं । नेपाली कांग्रेसको १५औँ महाधिवेशनअन्तर्गत नयाँ नेतृत्व चयनका लागि भएको निर्वाचनको मतगणना सम्पन्न भएको छ । मधेश र बागमती प्रदेशबाट निर्वाचित हुने केन्द्रीय सदस्यहरूको अन्तिम मतपरिणाम आएसँगै शुक्रबार बिहान सबै पदको गणना सकिएको हो । निर्वाचन समितिका सदस्य सचिव राजु कटुवालकाअनुसार २३ असोज रातिदेखि सुरु भएको मतगणना एक सातामै पूरा भएको छ । अहिले गणना भएका मतको रुजु गर्ने काम भइरहेको र केही समयमै अन्तिम परिणाम सार्वजनिक गर्ने तयारी गरिएको उहाँले जानकारी दिनुभयो । यसअघि लुम्बिनी, गण्डकी, उपत्यका, श्रमिक, शहीद परिवार तथा द्वन्द्वपीडिततर्फका केन्द्रीय सदस्यको मतगणना सम्पन्न भइसकेको थियो । सहमहामन्त्रीसहित खुला तथा महिला केन्द्रीय सदस्य चयन हुने खसआर्य र थारू समूहको मतगणना पनि राति नै सकिएको कटुवालले बताउनुभयो । यसपटक कांग्रेसको महाधिवेशनमा मतगणनाको गति अघिल्लो अधिवेशनको तुलनामा उल्लेख्य रूपमा तीव्र देखिएको छ । १४औँ महाधिवेशनमा ४ हजार ७०० मतदाताको मत गन्न १२ दिन लागेको थियो भने यसपटक ७ हजार ३९२ मतदाताको मत एक सातामै गणना गरिएको निर्वाचन समितिले जनाएको छ । कटुवालकाअनुसार मतगणना सुरु भएदेखि नै दिनरात गरी करिब २५ समूह परिचालन गरिएको थियो । यसपटक झन्डै एक लाख ६२ हजार मतपत्र गणना गर्नुपरेको थियो । कुल २२९ पदका लागि निर्वाचन भएकोमा ७७ प्रकारका पद रहेका थिए भने प्रत्येक मतदाताले २३ वटा मतपत्रमा मतदान गर्नुपर्ने व्यवस्था थियो । निर्वाचन समितिले मतदानदेखि मतगणनासम्म कुनै विवाद उत्पन्न नभएको र प्रक्रिया सौहार्दपूर्ण रूपमा सम्पन्न भएको जनाएको छ । अघिल्लो महाधिवेशनको तुलनामा यसपटक दोब्बरभन्दा बढी गतिमा मतगणना सम्पन्न भएको कटुवालको दाबी छ । मतपरिणाम सार्वजनिक भएपछि निर्वाचित पदाधिकारी तथा केन्द्रीय सदस्यलाई प्रमाणपत्र वितरण र शपथग्रहण गराउने कार्यक्रम दशैंलगत्तै गर्ने तयारी छ । त्यसपछि नयाँ कार्यसमितिको पहिलो बैठक बस्ने नेताहरूले बताएका छन् । नयाँ कार्यसमितिको पहिलो बैठकबाट स्थानीय तह निर्वाचनको तयारी तथा रणनीतिसम्बन्धी खाका तयार पार्ने विषयमा समेत छलफल हुने बताइएको छ ।