शिवपुरी नागार्जुन राष्ट्रिय निकुञ्जमा सर्प उद्धार तथा ह्यान्डलिङ तालिम

<p><strong>काठमाडौं ।</strong> शिवपुरी नागार्जुन राष्ट्रिय निकुञ्ज क्षेत्रमा दुई दिने सर्प उद्धार तथा ह्यान्डलिङ तालिम सञ्चालन गरीएको छ । नेपाल ग्रामीण पुनर्निर्माण संस्था (आरआरएन) को आयोजना केइदानरेन प्रकृति संरक्षण कोषको आर्थिक सहयोगमा सञ्चालित स्थानीय नेतृत्वमा सञ्चालित प्रकृति संरक्षण परियोजनाअन्तर्गत यो तालिम आयोजना गरिएको आरआरएनका परियोजना प्रमुख भरत शर्माले जानकारी दिनुभयो ।</p> <p>तालिम निकुञ्ज, मध्यवर्ती क्षेत्र व्यवस्थापन समिति, मध्यवर्ती क्षेत्र उपभोक्ता समितिहरू र मध्यवर्ती सामुदायिक वनहरुको समन्वयमा सञ्चालन भएको हो । निकुञ्जको मध्यवर्ती क्षेत्रमा सर्पसँग सम्बन्धित घटना भइरहने गरेको सन्दर्भमा निकुञ्ज प्रशासनसँगको समन्वयमा तालिम आयोजना गरिएको हो ।</p> <p>जीवशास्त्री तथा प्रशिक्षक कमल देवकोटा र सर्प उद्धारकर्ता सुबोधराज आचार्यद्धारा सैद्धान्तिक सत्र र प्रयोगात्मक कक्षामार्फत तालिम गराइयो । अनुभवी ह्यान्डलरहरूले माउन्टेन पिट भाइपर, धामन र गोमन (मोनोक्ल्ड कोब्रा) लगायतका जीवित सर्प ल्याएका थिए । यसबाट सहभागीहरूले यस क्षेत्रमा भेटिन सक्ने प्रजातिहरूलाई नजिकबाट चिन्ने अवसर पाए । तालिम सत्रपछि सबै सर्पलाई सुरक्षित रूपमा तिनीहरूको प्राकृतिक बासस्थानमा छाडिएको थियो ।</p> <p>तालिममा निकुञ्जका अधिकारी, मध्यवर्ती क्षेत्र व्यवस्थापन समितिका पदाधिकारी र मध्यवर्ती क्षेत्र उपभोक्ता सदस्यहरू, नेपाली सेनाका जवान, नेचर गाइड, विद्यार्थी र आरआरएनका कर्मचारीसहित ५३ जनाको सहभागीता थियो । आरआरएनले निकुञ्जलाई सर्प ह्यान्डलिङका आधारभूत उपकरणहरू पनि हस्तान्तरण गरेको छ । यी सीप र उपकरणका सहयोगले सहभागी तथा निकुञ्जका कर्मचारीहरूले निकुञ्ज र वरपरका क्षेत्रमा सर्पको सामना हुँदा थप सुरक्षित रूपमा प्रतिक्रिया जनाउन सक्ने बताइएको छ । यसले सर्पदंशको जोखिम र सर्पको अनावश्यक मारिने समस्यालाई घटाउने अपेक्षा गरिएको छ ।</p>