गुणस्तरहीन पाइएपछि ‘स्वास्थ्य श्री’ तोरीको तेल बजारबाट फिर्ता गर्न निर्देशन

काठमाडौं । बजार अनुगमनका क्रममा गुणस्तरहीन पाइएपछि सरकारले ‘स्वास्थ्य श्री’ ब्रान्डको तोरीको तेल बजारबाट तत्काल फिर्ता गर्न निर्देशन दिएको छ। खाद्य प्रविधि तथा गुण नियन्त्रण विभागले उक्त तेलको बिक्री वितरणमा रोक लगाउँदै सम्बन्धित ब्याचका सबै उत्पादन बजारबाट फिर्ता गर्न आदेश जारी गरेको हो। स्वास्थ्य तथा खाद्य स्वच्छता मन्त्रालय मातहतको विभागले बबरमहलस्थित कार्यालयबाट गरिएको प्रयोगशाला परीक्षणमा चितवनमा उत्पादित उक्त तोरीको तेल न्यूनस्तरको पाइएको जनाएको छ। विभागका महानिर्देशक सञ्जिवकुमार कर्णका अनुसार चितवनको खैरहनीस्थित रिलायबल नेपाल एग्रो लिमिटेडले उत्पादन गरेको एक लिटरको ‘स्वास्थ्य श्री’ ब्रान्डको तोरीको तेल गुणस्तर परीक्षणमा न्यूनस्तरको पाइएको हो। आयातित तोरीको दानाबाट उत्पादन गरिएको उक्त तेलको ब्याच नम्बर ‘आरपी ०५’ रहेको छ। उत्पादन मिति सन् २०२६ सेप्टेम्बर १ उल्लेख गरिएको तेलको उपभोग्य अवधि नौ महिना रहेको विभागले जनाएको छ। खाद्य स्वच्छता तथा गुणस्तर ऐन, २०८१ को दफा ३८ को उपदफा (२) अनुसार विभागले उक्त ब्याच नम्बरका सम्पूर्ण उत्पादन तत्काल बजारबाट फिर्ता गर्न निर्देशन दिएको हो। सोही दफाको उपदफा (४) अनुसार उक्त तेलको थप बिक्री वितरण नगर्न र नगराउनसमेत आदेश दिइएको छ। विभागको निर्देशनसँगै सम्बन्धित ब्याचको तेल बजारबाट फिर्ता गर्नुपर्ने भएको छ। उपभोक्ताले खरिद गरेको तेलको ब्रान्ड, ब्याच नम्बर र उत्पादन मिति जाँच गर्नु उपयुक्त हुन्छ।