स्कारपियोको ठक्करबाट १७ वर्षीय युवकको मृत्यु, दुई जना घाइते

बारा । बाराको महागढीमाई नगरपालिका–१ स्थित हुलाकी राजमार्गको प्लाई फ्याक्ट्री चोकमा भारतीय नम्बर प्लेटको स्कारपियोले मोटरसाइकललाई ठक्कर दिँदा १७ वर्षीय युवकको मृत्यु भएको छ भने दुई जना घाइते भएका छन् । आइतबार बिहान ११ः३० बजे बरियारपुरबाट कलैयातर्फ जाँदै गरेको भारतीय नम्बर प्लेट बीआर १९ जी ९९२१ को स्कारपियोले विपरीत दिशाबाट आउँदै गरेको बागमती प्रदेश ०३–००५ प ८८५५ नम्बरको मोटरसाइकललाई ठक्कर दिएको जिल्ला प्रहरी कार्यालय बाराले जनाएको छ । दुर्घटनामा मोटरसाइकल चालक कलैया उपमहानगरपालिका–२१ निवासी परमानन्द यादवका १७ वर्षीय छोरा धिरज यादव गम्भीर घाइते हुनुभएको थियो । उहाँलाई उपचारका लागि परवानीपुरस्थित एलएस न्युरो अस्पताल लगिएकोमा उपचारकै क्रममा बिहान ११ः५५ बजे मृत्यु भएको प्रहरीले जनाएको छ । मोटरसाइकलको पछाडि सवार कलैया उपमहानगरपालिका–२१, भोडहाका १६ वर्षीय नगेश साह र १८ वर्षीय अरुण यादव घाइते भएका छन् । जिल्ला प्रहरी कार्यालय बाराका प्रवक्ता प्रहरी नायब उपरीक्षक मिनबहादुर घलेका अनुसार नगेशको दाहिने हात, अनुहार र बायाँ खुट्टामा चोट लागेको छ भने अरुणको दाहिने हात र खुट्टामा चोट लागेको छ । दुवै जनाको एलएस न्युरो अस्पतालमा उपचार भइरहेको र अवस्था सामान्य रहेको उहाँले जानकारी दिनुभयो । दुर्घटनामा संलग्न स्कारपियो र त्यसका चालक रौतहटको परोहा नगरपालिका–३ निवासी ३८ वर्षीय अरुणकुमार दुबेलाई नियन्त्रणमा लिएर अनुसन्धान सुरु गरिएको प्रहरीले जनाएको छ । दुर्घटनामा परेको मोटरसाइकल प्रहरी चौकी बरियारपुरको नियन्त्रणमा रहेको छ । प्रहरी नायब उपरीक्षक घलेले चाडपर्वका समयमा सवारीसाधन चलाउँदा विशेष सतर्कता अपनाउन, ट्राफिक नियमको पूर्ण पालना गर्न र तीव्र गतिमा सवारी नचलाउन सबै चालकलाई आग्रह गर्नुभएको छ ।