काठमाडाैं । सिद्धार्थ बैंक नेपाल प्रिमियर लिग (एनपीएल) अन्तर्गत आज भइरहेको पहिलो क्वालिफायर खेलमा लुम्बिनी लायन्सविरुद्ध सुदूरपश्चिम रोयल्सका नयाँ अनुबन्धित खेलाडी जर्ज मुन्से पहिलो बलमै गोल्डेन डकआउट भएका छन्। आज भइरहेको खेलमा लुम्बिनी लायन्सले टस जितेर पहिले फिल्डिङ गर्ने निर्णय गरेसँगै सुदूरपश्चिम रोयल्सले पहिले ब्याटिङ गरेको छ। सुदूरपश्चिमबाट प्लेअफका खेल खेल्नका लागि टोलीमा अनुबन्धित भएका स्कटल्यान्डका आक्रामक ओपनर जर्ज मुन्से पहिलो ओभरको पहिलो बलमै रुबेन ट्रम्पेलम्यानको बलमा आउट हुन पुगे। यसअघि एनपीएलको दोस्रो संस्करण विराटनगर किङ्सबाट खेलेका मुन्सेले यसपटक सुदूरपश्चिम रोयल्सबाट खेल्न आएका हुन् । सुदूरपश्चिमका अर्का स्कटिस खेलाडी ब्रान्डन म्याकमुलेन भने यसअघि स्वदेश फर्किसकेका छन्। लिग चरणमा सातमध्ये पाँच खेल जितेर १० अंक जोड्दै सुदूरपश्चिम दोस्रो स्थानमा रहँदै प्लेअफमा पुगेको हो। लगातार तीन संस्करण प्लेअफमा पुग्ने पहिलो टोली बनेको सुदूरपश्चिमले यसअघि दुई संस्करणमा फाइनल खेले पनि उपाधि जित्न सकेको छैन। यसपटक उपाधि जित्ने लक्ष्यसहित मैदान उत्रिएको सुदूरपश्चिमका लागि मुन्सेको यो खराब सुरुआतले ठूलो झट्का दिएको छ।
सुदूरपश्चिमका जर्ज मुन्से गोल्डेन डकआउट

Read Complete Original Article
Published originally on केन्द्रबिन्दु






