साहित्यकार मोती शोभा श्रेष्ठका पाँच नयाँ कृति सार्वजनिक

काठमाडौं। साहित्यकार मोती शोभा श्रेष्ठका नेपाली, नेपाल भाषा र अंग्रेजी भाषामा लेखिएका पाँच नयाँ कृति एकैसाथ लोकार्पण गरिएका छन्। कार्यक्रममा वक्ताहरूले बहुभाषिक र विविध विधाका कृतिको प्रकाशनले नेपाली साहित्यलाई थप समृद्ध बनाउने विश्वास व्यक्त गरे। श्रेष्ठका नेपाली भाषाका कथासङ्ग्रह सपनाको उडान र यात्रा संस्मरण यात्राको वेग : अनुभूतिको संवेग लोकार्पण गरिएका छन्। नेपाल भाषामा कथासङ्ग्रह तक्यङ्गु सुका र लघु उपन्यास रङ्गीचङ्गी स्वान छायपियातगु केब सार्वजनिक भए। अंग्रेजी भाषामा लघु उपन्यास Mother Who Named Me Satya लोकार्पण गरिएको छ। लोकार्पित कृतिमाथि वरिष्ठ कथाकार एवं उपन्यासकार भागीरथी श्रेष्ठ र साहित्यकार तथा चित्रकार ज्ञानेन्द्र विवशले टिप्पणी गरेका थिए। सपनाको उडान मा ३८ कथा समेटिएका छन्। मानव जीवन, संवेदना, प्रेम, प्रकृति र समसामयिक सामाजिक विषयलाई कथामा प्रस्तुत गरिएको छ। त्यस्तै, यात्राको वेग : अनुभूतिको संवेग मा विभिन्न स्थानका इतिहास, संस्कृति, रहनसहन र यात्राका अनुभव समेटिएका छन्। नेपाल भाषाको कथासङ्ग्रह तक्यङ्गु सुका मा ६० कथा रहेका छन्। रङ्गीचङ्गी स्वान छायपियातगु केब ले पारिवारिक संरचनामा आएको परिवर्तन, संयुक्त परिवार र अन्तरजातीय मेलमिलापका विषय उठाएको छ। अंग्रेजी लघु उपन्यास Mother Who Named Me Satya मा बालश्रम र बालबालिकाको संरक्षणको सवाललाई प्रस्तुत गरिएको छ। नेपाल सरकारको सहसचिव पदबाट अवकाश पाएकी श्रेष्ठ साहित्यिक तथा सामाजिक गतिविधिमा सक्रिय छिन्। उनले २०७८ सालदेखि साहित्य सिर्जना सुरु गरेकी हुन्। यसअघि उनका नेपाली भाषामा पाँच लघु उपन्यास र दुई कथासङ्ग्रह प्रकाशित भइसकेका छन्। उनका केही कृति नेपाल भाषा र अंग्रेजीमा समेत अनुवाद तथा प्रकाशन भएका छन्। पूर्वअर्थमन्त्री एवं साहित्यकार शंकरप्रसाद कोइरालाको अध्यक्षतामा आयोजित कार्यक्रममा साहित्यकार विमल कोइराला प्रमुख अतिथि तथा नेपाली साहित्य स्रष्टा समाजका अध्यक्ष श्रीओम श्रेष्ठ विशेष अतिथिका रूपमा सहभागी थिए।