सरकारलाई विश्वप्रकाशको प्रश्न : ‘नियन्त्रणमा रहेको व्यक्तिको बयानका आधारमा कांग्रेसको बदनाम गर्न मिल्छ ?’

काठमाडौं। नेपाली कांग्रेसका वरिष्ठ उपसभापति विश्वप्रकाश शर्माले सरकारको नियन्त्रणमा रहेका व्यक्तिका कथित बयान र अडियो सार्वजनिक गरेर कांग्रेस नेतृत्वलाई बदनाम गर्न खोजिएको आरोप लगाएका छन्। बुधबार पार्टी केन्द्रीय कार्यालय सानेपामा आयोजित पत्रकार सम्मेलनमा बोल्दै शर्माले सरकारकै नियन्त्रणमा रहेका व्यक्तिबाट रेकर्ड गराइएको भनिएका सामग्री किस्ताबन्दीमा सार्वजनिक गरिनुले तिनको विश्वसनीयतामाथि प्रश्न उठाएको बताए। सरकारको नियन्त्रणमा रहेको व्यक्तिले के बोल्ने र कति बोल्ने भन्ने कुरा सरकारकै प्रभावमा हुन सक्ने उल्लेख गर्दै उनले त्यस्ता सामग्रीका आधारमा कांग्रेस नेतृत्वमाथि आरोप लगाउनु उचित नभएको बताए। कांग्रेसमाथि लगाइएका आरोप तथा सार्वजनिक भइरहेका कथित अडियो र बयानहरू निराधार, कपोलकल्पित र नियोजित रहेको उनको दाबी छ। यस्ता गतिविधिपछाडिको उद्देश्य, बदनियत र संलग्न पात्रहरू समयक्रममा थप उजागर हुँदै जाने उनले बताए। शर्माले कांग्रेस आफूमाथि उठेका प्रश्नबाट नभाग्ने स्पष्ट पार्दै सबै घटनाको स्वतन्त्र, निष्पक्ष, विधिसम्मत र विश्वसनीय अनुसन्धान हुनुपर्ने माग गरे। ‘असम्बन्धित व्यक्ति, कहिल्यै उठबसै नभएको व्यक्ति, जो आज सरकारको नियन्त्रणमा छ, के रेकर्ड गराउने, कति गराउने सरकारको हातमा छ। अनि सरकार किस्ता–किस्तामा अनेक चिजहरू बाहिर लिएर आइरहेको छ र हाम्रो नेतृत्वलाई बदनाम गर्ने प्रयास गरिरहेको छ,’ उनले भने। उनले कांग्रेस आफूमाथि र पार्टी नेतृत्वका विषयमा उठेका प्रत्येक प्रश्नको सामना गर्न तथा जस्तोसुकै छानबिनका लागि तयार रहेको बताए। उनका अनुसार पार्टीले विशेष बैठक बसेर पछिल्लो समय उठेका सबै विषयमा निष्पक्ष छानबिनको माग गर्ने निर्णय गरेको छ। कांग्रेसको वैधानिकता र नेतृत्वमाथि उठेका प्रश्नहरूको निरूपण राजनीतिक आरोप–प्रत्यारोपबाट नभई निष्पक्ष अनुसन्धानबाट हुनुपर्नेमा उनले जोड दिए। – न्युज एजेन्सी नेपाल