काठमाडौं । मधेश प्रदेशका मुख्यमन्त्री कृष्णप्रसाद यादवले पदबाट राजीनामा दिने तयारी गरेका छन्। प्रदेशसभामा विश्वासको मत प्राप्त गर्ने सम्भावना कमजोर भएपछि उनले सदनलाई सम्बोधन गर्दै राजीनामाको घोषणा गर्ने तयारी गरेका हुन्। प्रदेशसभामा प्रतिनिधित्व गर्ने प्रमुख राजनीतिक दलहरूले विश्वासको मत नदिने संकेत गरेपछि मुख्यमन्त्री यादव राजीनामा दिने निष्कर्षमा पुगेका हुन्। यसअघि जनमत पार्टीबाट मुख्यमन्त्री बनेका सतिश सिंहले पनि विश्वासको मत लिने घोषणा गरे पनि आवश्यक बहुमत जुटाउन नसकेपछि पदबाट राजीनामा दिएका थिए। मधेश प्रदेश सरकार टिकाउन प्रदेशसभाका ५४ सांसदको समर्थन आवश्यक छ। तर मुख्यमन्त्री यादव आबद्ध नेपाली कांग्रेससँग २२ सांसद मात्रै छन्। बहुमत पुर्याउन कांग्रेसलाई नेकपा (एमाले) वा जनता समाजवादी पार्टी (जसपा) नेपालमध्ये कम्तीमा एउटा ठूलो दलसहित अन्य साना दलको समर्थन आवश्यक थियो। प्रदेश सरकारका एक मन्त्रीका अनुसार कांग्रेस सभापति गगन थापाले मधेश प्रदेश सरकार जोगाउने प्रयासस्वरूप केन्द्रबाटै एमाले र जसपा नेपालका शीर्ष नेताहरूसँग संवाद गरेका थिए। त्यसका लागि उनी गुण्डुसमेत पुगेका थिए। तर दुवै दलसँग सहमति जुट्न सकेन। एमाले र जसपा नेपालले सरकारलाई समर्थन गर्न नसकिने अडान लिएपछि मुख्यमन्त्री यादव अल्पमतमा परेका हुन्। कुनै पनि दलबाट विश्वासको मत पाउने निश्चित आधार नदेखिएपछि सरकारको नेतृत्व छाड्नु नै उपयुक्त हुने निष्कर्षमा उनी पुगेको ती मन्त्रीले बताएका छन्।
विश्वासको मत नपाउने भएपछि मधेशका मुख्यमन्त्री कृष्णप्रसाद यादवले राजीनामा दिने
Read Complete Original Article
Published originally on केन्द्रबिन्दु
