विराटनगरका ६९ वर्षीय व्यापारीको हत्या आरोपमा तीन जना पक्राउ

विराटनगर । विराटनगरमा लामो समयदेखि व्यापार गर्दै आएका ६९ वर्षीय लालजी प्रसाद गुप्ताको हत्या आरोपमा प्रहरीले तीन जनालाई पक्राउ गरेको छ। पक्राउ पर्नेमा मुख्य अभियुक्त विराटनगर महानगरपालिका–६ स्वागत चोकका ३६ वर्षीय अफरोज आलम र शव व्यवस्थापनमा सहयोग गरेको आरोप लागेका दुई जना नाबालक छन्। पक्राउ परेका आलम विराटनगर–६ महावीर चोकमा हार्डवेयर गोदाम सञ्चालन गर्दै आएका थिए। प्रहरीले घटनामा संलग्न भएको आरोपमा १३ वर्षीय भारतीय र १६ वर्षीय नेपाली नाबालकलाई पनि नियन्त्रणमा लिएको छ। भारतको वाराणसी स्थायी घर भएका गुप्ता विगत ४० वर्षदेखि विराटनगरमा बसोबास गर्दै आएका थिए। उनी विराटनगर–६ धरान रोडमा ‘लाल ब्याट्री एण्ड सन्स ट्रेडर्स’ सञ्चालन गर्थे। गत कात्तिक ६ गते शुक्रबार दिउँसो करिब ३ बजेदेखि उनी पसलबाट बेपत्ता भएका थिए। परिवार र आफन्तले खोजी गरिरहेका बेला कात्तिक ८ गते आइतबार बिहान सुनसरीको बर्जु गाउँपालिका–२ भीमपुरस्थित केशलीया खोलाको किनारमा उनकाे शव फेला परेको थियो। सूक्ष्म अनुसन्धानपछि कात्तिक १० गते साँझ करिब ५ बजे अभियुक्तहरूलाई पक्राउ गरिएको सुनसरी प्रहरीले जनाएको छ। प्रहरीको प्रारम्भिक अनुसन्धानअनुसार केही समयअघि विराटनगर–६ स्थित माता इलेक्ट्रिक वर्क्सबाट पानी तान्ने मोटरको तार आलमले चोरी गरेको भन्दै गुप्ताले हल्ला फैलाएका थिए। यही विषयलाई लिएर उनीहरूबीच विवाद भएको थियो। विवाद बढेपछि आलमले गुप्तालाई घरमा बोलाएर फलामको जीआई पाइप प्रहार गरी हत्या गरेको प्रहरीको भनाइ छ। हत्यापछि शव लुकाउन र फाल्न आलमले दुई जना नाबालकको सहयोग लिएको तथा शवलाई केशलीया खोला किनारमा पुर्‍याएको प्रारम्भिक अनुसन्धानबाट खुलेको प्रहरीले जनाएको छ।