वर्षाले फूल खेतीमा क्षति, तिहार र छठको मुखमा किसान निराश

सिरहा । तिहार र छठ पर्वलाई लक्षित गरी फूल बिक्री गर्ने तयारीमा रहेका सिरहाका किसान लगातार दुई दिन परेको वर्षाले खेतीमा क्षति पुर्‍याएपछि निराश भएका छन्। फूल टिपेर बजार लैजाने तयारीमा रहेका किसानको महिनौँदेखिको मिहिनेत वर्षाका कारण खेर गएको छ। गोलबजार नगरपालिका–३ का किसान मनु स्याङ्दन विगत १५ देखि २० वर्षदेखि फूल खेती गर्दै आउनुभएको छ। उहाँले यस वर्ष चार कठ्ठा जग्गामा सयपत्री फूल लगाउनुभएको थियो। खेतीमा करिब एक लाख रुपैयाँ लगानी गर्नुभएका उहाँले चाडपर्वमा फूल बिक्री गरेर करिब चार लाख रुपैयाँ आम्दानी गर्ने अपेक्षा गर्नुभएको थियो। तर, वर्षाका कारण करिब दुई हजार ५०० बोट फूल भुइँमा ढलेपछि लगानी र आम्दानी दुवै गुमेको उहाँले बताउनुभयो। त्यस्तै, गोलबजार नगरपालिका–६ का किसान रुदल नायकको करिब छ कठ्ठा जग्गामा लगाइएको फूल खेतीमध्ये तीनदेखि चार कठ्ठाको फूल वर्षाले भुइँमा ढालिदिएको छ। सोही वडाकी किसान इन्द्रकुमारी लामाले पनि पाँच कठ्ठामा लगाएको सयपत्री फूलमा वर्षाले ठूलो क्षति पुर्‍याएको बताउनुभयो। करिब १० वर्षदेखि फूल खेती गर्दै आउनुभएकी उहाँले तिहार र छठ पर्वमा फूल बिक्री गरेर करिब चार लाख रुपैयाँ आम्दानी गर्ने अपेक्षा गर्नुभएको थियो। चाडपर्वको समयमा फूलको माग बढ्ने भए पनि बिक्रीका लागि तयार भएको फूल वर्षाले नष्ट गरेपछि किसानले ठूलो आर्थिक क्षति व्यहोर्नुपर्ने अवस्था आएको छ।