म्यानेजर र क्लब नेतृत्वसँगको भेटपछि मार्टिनेजले माफे मागी

काठमाडौं । इंग्लिस क्लब म्यानचेस्टर युनाइटेडका रक्षक लिस्यान्ड्रो मार्टिनेजले क्लबप्रति गरेको आलोचनाको बारेमा माफी मागेका छन् । क्लबको रोलक्रमको बारेमा आलोचना गरेका मार्टिनेजले बिहीबार मुख्य प्रशिक्षक माइकल क्यारिकलगायत पदाधिकारीहरू भेटेका थिए । उनले गत मंगलबार च्याम्पियनस लिगअन्तर्गत स्पेनिस क्लब एट्लेटिको मड्रिडविरुद्धको हारपछि आलोचना गरेका थिए । मार्टिनेजले भेटपछि आफूले बोलेका कुरा उचित नरहेको बताउँदै माफी मागेका हुन् । “मैले क्लब नेतृत्व र म्यानेजरसँग भेटे । उहाँहरूसँग मेरो सकारात्मक कुरा भयो । म फुटबललाई अन्तरमनदेखि माया गर्ने खेलाडी हुँ । हारको दबाबका कारण मैले त्यस्तो बोलेँ । र, मैले पुनः विचार गर्दा ती कुराहरू उचित लागेन । म माफी माग्छु,” मार्टिनेजले भने । उनले २–० ले पराजित भएको उक्त खेलपश्चात् अन्तर्वार्तामा टोलीका फुटबल निर्देशक जेसन विल्कक्सलाई इंगित गर्दै क्लबले युरोपमा चुनौती पेस गर्ने सक्ने टिमको लागि नयाँ र अब्बल खेलाडीहरू भित्र्याउनुपर्ने बताएका थिए । उनले माफी माग्दै टिम अहिले लक्ष्य पूरा गर्न केन्द्रित रहेको धारणा राखे । हाल प्रिमियर लिगमा टोली १३औँ स्थानमा छ । आइतबार टोलीले लिगअन्तर्गत सातौँ स्थानमा रहेको लिड्स युनाइटेडसँग प्रतिस्पर्धा गर्ने तालिका छ । टोलीले यस वर्ष प्रतियोगितामा गरेका सुरुआत ४० वर्षयताकै खराब सुरुआत रहेको बताइएको छ ।