मुगु र हुम्लाका बस्तीमा सञ्चार सेवा अवरुद्ध, दसैँपछि मात्रै मर्मत हुने

मुगु । मुगुको रुघा र सोरु गाउँपालिकाको नाथर्पुमा रहेका टावरको ‘लिङ्क डिभाइस’मा समस्या आएपछि मुगु र हुम्लाका विभिन्न बस्तीमा इन्टरनेट तथा टेलिफोन सेवा प्रभावित भएको छ । गत सातादेखि फोरजी टावरमा देखिएको प्राविधिक समस्या दसैँपछि मात्रै समाधान गर्न सकिने नेपाल टेलिकमले जनाएको छ । टेलिकमको मुगु कार्यालयका प्रमुख उमेश चौधरीका अनुसार टावरमा जडान गरिएका ‘लिङ्क डिभाइस’मा समस्या आएपछि सञ्चार सेवा अवरुद्ध भएको हो । दसैँ बिदामा कर्मचारी घर गएकाले तत्काल मर्मत गर्न नसकिने उनले बताए। टावरमा समस्या आएपछि मुगुको सोरु गाउँपालिकासहित हुम्लाका अदानचुली, ताँजाकोट, सर्केगाड र चङ्खेली गाउँपालिकाका अधिकांश बस्तीमा सञ्चार सेवा प्रभावित भएको छ । अदानचुली गाउँपालिका–४ का वडासदस्य सिंह बोहराले समस्या समाधानका लागि टेलिकमका कर्मचारीलाई पटक–पटक फोन गरेर आग्रह गरिएको बताए । सञ्चार सेवा अवरुद्ध हुँदा दसैँमा घर आउने तथा घरबाट बाहिर जाने आफन्तसँग सम्पर्क गर्न र रकम पठाउनसमेत समस्या भएको उनले बताए। भौगोलिक विकटताका कारण वैकल्पिक सञ्चार माध्यमको पहुँचसमेत सहज नभएका यी क्षेत्रका नागरिक टेलिकमको सेवा अवरुद्ध हुँदा थप समस्यामा परेका छन् । दसैँका बेला आफन्तसँग सम्पर्क गर्न र आर्थिक कारोबार गर्नसमेत कठिनाइ भएको स्थानीयले बताएका छन् ।