भारत विरोधी राष्ट्रवादको युग सकियो : अर्थमन्त्री वाग्ले

काठमाडौं । अर्थमन्त्री डा. स्वर्णिम वाग्लेले नेपालमा भारत विरोधी राष्ट्रवादको युग सकिएको बताउनुभएको छ । भारतको नयाँ दिल्लीमा आयोजित ‘एनडीटीभी वल्र्ड समिट २०२६’ मा बोल्दै अर्थमन्त्री वाग्लेले नेपालको नयाँ नेतृत्व पहिलेको भन्दा फरक रहेको र वालेन्द्र शाहको प्रशासनले भारतसँग अझ राम्रो सम्बन्ध निर्माण गर्न चाहेको बताउनुभयो । उहाँले भारत र नेपालबीचको सम्बन्धमा कहिलेकाहीँ कठिनाइहरू आउने भए पनि यी दुई देश एकअर्कासँग निकै बलियो रूपमा जोडिएका उल्लेख गर्नुभयो । ‘भारत र नेपालबीचको सम्बन्ध निकै गहिरो छ । यी दुई देशहरू भौगोलिक रूपमा मात्र नभई गहिरो सांस्कृतिक सम्बन्धका माध्यमबाट पनि जोडिएका छन्’, उहाँले भन्नुभयो । यसैबीच अर्थमन्त्री वाग्लेले प्रधानमन्त्री वालेन्द्र शाहले सन् २०२६ को अन्त्यसम्ममा भारतको भ्रमण गर्न सक्ने बताउनुभएको छ । उहाँले प्रधानमन्त्री शाहको भारत भ्रमणले दुई देशबीचको सम्बन्धलाई नयाँ उचाइमा पुर्‍याउने विश्वास व्यक्त गर्नुभयो । साथै भारतको विकासबाट नेपालले पनि लाभ प्राप्त गर्ने उहाँको भनाइ छ । अर्थमन्त्री वाग्लेले सङ्कटको समयमा नेपाललाई सहयोग गरेकोमा भारतको प्रशंसा पनि गर्नुभयो । उहाँले भूकम्पदेखि पछिल्ला बाढीसम्म भारत सधैँ नेपाललाई मद्दत गर्न अघि बढेको कुरा उल्लेख गर्नुभयो । The post भारत विरोधी राष्ट्रवादको युग सकियो : अर्थमन्त्री वाग्ले appeared first on Corporate Khabar : Nepals First Corporate News Magazine and Portal.