फ्रान्समा सरकारविरुद्ध प्रदर्शन, १३५ जना पक्राउ

काठमाडौं। फ्रान्सका राष्ट्रपति इमानुएल म्याक्रोनको नीति, बढ्दो महँगी र आर्थिक असमानताको विरोध गर्दै शनिबार देशभरका सयभन्दा बढी स्थानमा दशौँ हजार नागरिक सडकमा उत्रिएका छन्। गत साता भएका हिंसात्मक घटनापछि सरकारले सुरक्षा व्यवस्था कडा पारे पनि प्रदर्शन रोकिएको छैन। फ्रान्सका गृहमन्त्री लरेन्ट नुनेजका अनुसार देशभरबाट अशान्ति मच्चाएको आरोपमा १३५ जनालाई प्रहरीले पक्राउ गरेको छ। शनिबार दिउँसोसम्म करिब ३५ हजार मानिस प्रदर्शनमा सहभागी भएका थिए। पेरिस, मार्सेली, लियोन, बोर्डो र स्ट्रासबर्गलगायतका सहरमा ठूलो संख्यामा नागरिकले र्याली निकालेका छन्। पेरिसमा प्रदर्शन शान्तिपूर्ण रहे पनि नान्टेस र लियोनमा प्रदर्शनकारीले निषेधित क्षेत्र प्रवेश गर्न खोजेपछि प्रहरीले अश्रुग्यास र पानीको फोहोरा प्रयोग गरेको छ। पेरिसमा प्रहरीले केही प्रदर्शनकारीबाट ग्यास मास्क र घरेलु हतियार बरामद गरेको जनाएको छ। प्रदर्शनकारीले सरकारले जनताको आवाज नसुनेको, अत्यधिक कर लगाएको र धनी वर्गलाई मात्रै प्राथमिकता दिएको आरोप लगाएका छन्। प्रदर्शनमा वामपन्थी नेता तथा राष्ट्रपतिका पूर्वउम्मेदवार जिन-लुक मेलेनचोन पनि सहभागी भएका छन्। उनले राष्ट्रपति म्याक्रोनलाई जनताको माग सम्बोधन गर्न आग्रह गरेका छन्। गत साता भएका हिंसात्मक प्रदर्शनका क्रममा ऐतिहासिक भवन र पसलमा आगजनी भएको थियो भने दुई हजार सात सयभन्दा बढी मानिस पक्राउ परेका थिए। फ्रान्समा जारी यो आन्दोलनको प्रभाव अन्य युरोपेली मुलुकमा पनि देखिन थालेको छ।