प्रहरीको नयाँ नेतृत्वको प्राथमिकता : अपराधको डिजिटल स्वरूपसँग जुध्न विशेष गुनासो सुनुवाइ संयन्त्र बनाइने

काठमाडौं। नवनियुक्त प्रहरी महानिरीक्षक (आईजीपी) डा. मनोजकुमार केसीले बदलिँदो सुरक्षा चुनौती सामना गर्न नेपाल प्रहरीलाई प्रविधिमैत्री र विशिष्टीकृत बनाउने बताएका छन्। उनले साइबर अपराध, क्रिप्टो कारोबार, डीपफेक, भ्रामक सूचना र संगठित अपराध नियन्त्रणलाई प्राथमिकतामा राख्दै प्रहरी संगठनको कार्यशैलीमा रूपान्तरण गर्ने प्रतिबद्धता जनाएका छन्। बुधबार दज्र्यानी चिह्न ग्रहण गरेपछि प्रहरी संगठनलाई सम्बोधन गर्दै आईजीपी केसीले अपराधको स्वरूप परिवर्तन भइरहेकाले त्यसअनुसार प्रहरीको क्षमता र कार्यशैली पनि परिवर्तन गर्नुपर्ने बताए। साइबर ठगी, डीपफेक, भ्रामक सूचना तथा खुला सीमानाका कारण उत्पन्न सुरक्षा चुनौती सामना गर्न गृह मन्त्रालयसँगको समन्वयमा प्रभावकारी योजना अघि बढाउने उनको भनाइ छ। प्रहरी संगठनको आन्तरिक सुधारलाई पनि प्राथमिकतामा राखेका केसीले तल्लो तहका प्रहरी कर्मचारीका गुनासा सम्बोधन गर्न प्रहरी महानिरीक्षकको सचिवालय मातहत रहने गरी विशेष गुनासो सुनुवाइ संयन्त्र तत्काल स्थापना गर्ने घोषणा गरेका छन्। सरुवा, बढुवा र व्यावसायिक निष्पक्षतामा सुधार गर्दै प्रहरी कर्मचारीको मनोबल बढाउने तथा वरिष्ठ प्रहरी अधिकृतलाई थप जवाफदेही बनाउने उनको योजना छ। विशेषगरी कनिष्ठ प्रहरी अधिकृत तथा तल्लो तहका कर्मचारीका समस्या र गुनासालाई संस्थागत रूपमा सम्बोधन गर्ने संयन्त्र निर्माण गरिने उनले बताए। जलवायु परिवर्तन र प्राकृतिक विपद्का चुनौती सामना गर्न पनि प्रहरीको क्षमता अभिवृद्धि गर्नुपर्नेमा उनले जोड दिएका छन्। त्यसका लागि पर्याप्त स्रोतसाधन र कानुनी स्पष्टता आवश्यक रहेको उनको भनाइ छ। विगतका द्वन्द्व, भूकम्प र कोभिड–१९ महामारीका बेला नेपाल प्रहरीले निर्वाह गरेको भूमिका र सेवाभावको स्मरण गर्दै आईजीपी केसीले आगामी दिनमा नागरिकले प्रहरीलाई देख्दा डर होइन, भरोसा गर्ने वातावरण निर्माण गर्ने प्रतिबद्धता जनाएका छन्। – न्युज एजेन्सी नेपाल