प्रचण्डको अपिल- निरंकुशता र अराजकताको विरोध गरौँ

काठमाडौं । नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ले राष्ट्रिय जागरण अभियानमा सक्रिय सहभागिता जनाउन आम नेपाली जनसमुदायलाई अपिल गरेका छन् । देश जटिल राजनीतिक, आर्थिक तथा सामाजिक संकटबाट गुज्रिरहेको उल्लेख गर्दै उनले राष्ट्रिय स्वाधीनताको रक्षा, लोकतन्त्र र जनअधिकारको संरक्षण तथा जनजीविकाका समस्या समाधानका लागि अभियान सञ्चालन गर्न लागिएको बताएका छन् । नेकपाले आजदेखि मङ्सिर २५ गतेसम्म राष्ट्रिय जागरण अभियान सञ्चालन गर्ने निर्णय गरेको छ । अपिलमा वर्तमान सरकारले जनताको अपेक्षाअनुसार परिणाम दिन नसक्दा निराशा, असन्तुष्टि र अन्योल बढेको उल्लेख गरिएको छ । महँगी, बेरोजगारी र युवा पलायन बढिरहेको तथा किसान, मजदुर, उद्यमी र व्यवसायीले विभिन्न कठिनाइ भोगिरहेको भन्दै पार्टीले जनजीविकाका सवाललाई प्राथमिकतामा राख्ने जनाएको छ । त्यस्तै, फरक मतप्रति असहिष्णु व्यवहार, अभिव्यक्ति स्वतन्त्रतामाथि रोक लगाउने प्रवृत्ति तथा लोकतान्त्रिक संस्था, ट्रेड युनियन, विद्यार्थी संगठन, निजी क्षेत्र र नागरिक अधिकारमाथिको हस्तक्षेपप्रति पनि पार्टीले चिन्ता व्यक्त गरेको छ । यस्ता प्रवृत्तिले संघीय लोकतान्त्रिक गणतन्त्र, समानुपातिकता, समावेशिता, धर्मनिरपेक्षता र संविधानका उपलब्धिमाथि खतरा उत्पन्न गरेको अपिलमा दाबी गरिएको छ । अभियानका क्रममा पार्टीका केन्द्रीय नेताहरूको नेतृत्वमा गाउँ, वडा र टोलसम्म पुगेर किसान, मजदुर, युवा, विद्यार्थी, महिला, दलित, आदिवासी जनजाति, मधेसी, थारू, अल्पसङ्ख्यक समुदाय, बुद्धिजीवी, शिक्षक, कर्मचारी तथा उद्यमी–व्यवसायीसँग प्रत्यक्ष संवाद गरिने जनाइएको छ । निरंकुशता र अराजकताको विरोध गर्दै महँगी, बेरोजगारी, कालोबजारी, भ्रष्टाचार, आर्थिक असुरक्षा, सार्वजनिक सेवामा हुने ढिलासुस्ती, सुकुम्बासी तथा श्रमिकका समस्या र वैदेशिक रोजगारीसँग सम्बन्धित कठिनाइबारे तथ्य तथा अनुभव सङ्कलन गरिने पार्टीले जनाएको छ । जनताबाट प्राप्त गुनासा र सुझावलाई सम्बन्धित स्थानीय, प्रदेश तथा संघीय निकायसम्म पुर्‍याउने, आवश्यकताअनुसार मागपत्र तथा ज्ञापनपत्र बुझाउने र समाधानका लागि निरन्तर पहल गर्ने पनि अपिलमा उल्लेख छ । गुनासाको अभिलेख राख्ने र समाधानका लागि भएका प्रयासको प्रगतिबारे जनतालाई जानकारी दिने अभ्याससमेत अघि बढाइने पार्टीको भनाइ छ । यसैगरी, रसुवाको भोटेकोशीमा आएको विनाशकारी बाढीबाट भएको जनधनको क्षति तथा बेपत्ता नागरिकको खोज, उद्धार र राहत कार्यमा देखिएको लापरबाहीप्रति नेपाली कम्युनिष्ट पार्टीले आपत्ति जनाएको छ । विपद्का बेला नागरिकको जीवनरक्षा गर्नु राज्यको पहिलो दायित्व भएको उल्लेख गर्दै पार्टीले उपलब्ध स्रोतसाधन, दक्ष जनशक्ति र आधुनिक प्रविधिको अधिकतम परिचालन गरी बेपत्ता नागरिकको खोज तथा उद्धारलाई प्रभावकारी बनाउन माग गरेको छ । विपद् प्रभावितलाई तत्काल राहत, विस्थापित परिवारको सुरक्षित पुनर्स्थापना तथा सडक, खानेपानी, पुल, सञ्चार र विद्युत्लगायत क्षतिग्रस्त संरचनाको शीघ्र पुनर्निर्माण गर्न पनि सरकारको ध्यानाकर्षण गराइएको छ । बाढीपहिरो प्रभावित क्षेत्रको क्षतिको यथार्थ मूल्याङ्कन गरी राहत, पुनर्स्थापना र पुनर्निर्माणका काम पारदर्शी, प्रभावकारी र समयबद्ध रूपमा अघि बढाउन पार्टीले आग्रह गरेको छ । प्रचण्डले समाजवादलाई केवल नाराका रूपमा नभई आर्थिक असमानता र शोषण अन्त्य गर्ने, श्रमको सम्मान स्थापित गर्ने तथा शिक्षा, स्वास्थ्य र रोजगारीमा न्यायपूर्ण पहुँच सुनिश्चित गर्ने लक्ष्यका रूपमा व्याख्या गरेका छन् । राष्ट्रिय उत्पादन वृद्धि, कृषि तथा उद्योगको आधुनिकीकरण, रोजगारी सिर्जना, राष्ट्रिय पुँजीको विकास र स्रोतसाधनको न्यायपूर्ण वितरणमार्फत आत्मनिर्भर अर्थतन्त्र निर्माण गर्नुपर्ने उनको भनाइ छ । अभियानसँगै पार्टीको सदस्यता नवीकरण तथा अद्यावधिक, संगठनात्मक समायोजन, कार्यविभाजन र पार्टी एकताका बाँकी काम तल्लो तहसम्म सम्पन्न गरिने जनाइएको छ । पार्टीका नेता तथा कार्यकर्तालाई जनतामाझ विनम्रतापूर्वक जान, आलोचना स्वीकार गर्न र आफ्ना कमजोरी सच्याउन पनि प्रचण्डले आग्रह गरेका छन् ।