पूर्वप्रधानन्यायाधीश कल्याण श्रेष्ठलाई एसिया लाइफटाइम अचिभमेन्ट अवार्ड

काठमाडौँ। पूर्वप्रधानन्यायाधीश कल्याण श्रेष्ठलाई न्यायिक स्वतन्त्रता, मानवअधिकारको संरक्षण र न्यायमा पहुँच विस्तारमा पुर्‍याएको योगदानका लागि सन् २०२६ को एसिया कर्पोरेट एक्सिलेन्स एन्ड सस्टेनेबिलिटी अवार्डअन्तर्गत लाइफटाइम अचिभमेन्ट अवार्ड प्रदान गरिएको छ। मलेसियाको क्वालालम्पुरमा आयोजित कार्यक्रममा श्रेष्ठलाई ‘लाइफटाइम अचिभमेन्ट अवार्ड’ द्वारा सम्मान गरिएको हो। यसअघि चीन र भारतका पूर्वप्रधानन्यायाधीशले पनि यो अवार्ड प्राप्त गरेका थिए। सर्वोच्च अदालतका २४औँ प्रधानन्यायाधीशका रूपमा काम गरेका श्रेष्ठले संवैधानिक सर्वोच्चता, कानुनी शासन, न्यायिक स्वतन्त्रता र लोकतान्त्रिक मूल्यको संरक्षणमा पुर्‍याएको योगदानको कदर गर्दै सम्मान गरिएको आयोजकले जनाएका छन। उनको न्यायिक योगदानमा मौलिक हकको संरक्षण, सीमान्तकृत समुदायको अधिकार, वातावरणीय न्याय र संक्रमणकालीन न्यायसँग सम्बन्धित लगायतको विषय समेत मूल्यांकन गरिएको आयोजकको भनाई छ। श्रेष्ठले न्यायालय सुधार, मुद्दा व्यवस्थापन, न्यायमा नागरिकको पहुँच विस्तार र न्यायिक प्रणालीलाई पारदर्शी तथा जवाफदेही बनाउने विषयमा समेत जोड दिँदै आएका छन्। अवकाशपछि पनि उनी संवैधानिक बहस, कानुनी अध्ययन र सुशासनसम्बन्धी गतिविधिमा सक्रिय छन्। उनी संविधान निगरानी समूहका अध्यक्षसमेत हुन्।