पानीमा ४०.७४ किलोमिटर मोटरसाइकल चलाए, बनाए नयाँ विश्व कीर्तिमान

एजेन्सी । चिनियाँ मोटरसाइकल निर्माता कम्पनी जेडएक्समोटोका संस्थापक चाङ सुएले पानीमाथि मोटरसाइकल चलाएर नयाँ विश्व कीर्तिमान कायम गरेका छन्। उनले विशेष प्रविधिबाट परिमार्जन गरिएको मोटरसाइकलमार्फत पानीको सतहमा ४०.७४ किलोमिटर यात्रा गर्दै यसअघिको ३१.८ किलोमिटरको कीर्तिमान तोडेका हुन्। ३९ वर्षीय चाङले गत अक्टोबर २५ मा मध्य चीनको हुनान प्रान्तस्थित आफ्नो गृहनगर मायाङ मियाओ स्वायत्त काउन्टीको नदीमा उक्त कीर्तिमान बनाएका हुन्। चिनियाँ सञ्चारमाध्यम सीजीटीएनका अनुसार चाङले परिमार्जित एमएक्स४५० मोटरसाइकल नदीमा चलाएर पानीमा सबैभन्दा लामो दूरी पार गर्ने कीर्तिमान कायम गरेका हुन्। उद्धार डुंगा र स्वास्थ्यकर्मीको निगरानीमा गरिएको उक्त प्रयासलाई गिनिज वर्ल्ड रेकर्ड्सका अधिकारीहरूले जीपीएस ट्र्याकिङ, समय र भिडियो प्रमाणका आधारमा प्रमाणीकरण गरेका थिए। मोटरसाइकललाई पानीमा तैराउन विशेष फ्लोटेसन उपकरण र वाटरप्रुफिङ प्रविधि जडान गरिएको थियो। सामान्य अवस्थामा उक्त मोडलको मोटरसाइकलको तौल ९८ देखि १०२ किलोग्रामसम्म हुन्छ। कठिन मोड र शारीरिक थकानका बाबजुद चाङले लगातार ६ ल्याप पूरा गर्दै ४०.७४ किलोमिटरको दूरी पार गरेका थिए। गिनिजका निर्णायक सिओङ वेनले घटनास्थलमै उनको कीर्तिमान घोषणा गरेका थिए। चाङले २२ वर्षको उमेरमै पहिलोपटक पानीमा मोटरसाइकल चलाउने प्रयास गरेका थिए। त्यसको १७ वर्षअघि प्रविधिको सीमितताका कारण उनका लगातार चार प्रयास असफल भएका थिए। त्यतिबेला उनले बढीमा २० मिटर मात्रै दूरी पार गर्न सकेका थिए। यसपटकको सफलताका लागि चाङ र उनको टोलीले करिब पाँच महिना लगाएर मोटरसाइकलको तैरिने क्षमता, वाटरप्रुफ सिलिङ र पावर सिस्टममा सुधार गरेका थिए। विश्व कीर्तिमान कायम गरेपछि चाङले आफूले यो सफलता हासिल गर्न सक्नेमा पहिलेदेखि नै विश्वास रहेको बताए। असफल भएको भए पनि प्रयास गर्न नछाड्ने उनको भनाइ थियो। आफ्नै गृहनगरमा विश्व कीर्तिमान बनाउन पाउँदा आफ्नो वर्षौंदेखिको सपना पूरा भएको र उपलब्धि थप अर्थपूर्ण बनेको उनले बताए।