पहिलो खेलमै सुदूरपश्चिमको ब्याटिङ विजोग !

काठमाडौं । सिद्धार्थ बैंक नेपाल प्रिमियर लिग (एनपीएल) को तेस्रो संस्करणको पहिलो खेलमा सुदूरपश्चिम रोयल्सको ब्याटिङ निराशाजनक देखिएको छ। कीर्तिपुरस्थित त्रिवि क्रिकेट मैदानमा लुम्बिनी लायन्सविरुद्ध सुदूरपश्चिमले १२.४ ओभरमा ७० रन बनाउँदा ९ विकेट गुमाएको छ। टस जितेर लुम्बिनी लायन्सले पहिले बलिङ गर्ने निर्णय गरेपछि ब्याटिङमा उत्रिएको सुदूरपश्चिमका अधिकांश ब्याटर चल्न सकेनन्। टोलीले सुरुदेखि नै नियमित अन्तरालमा विकेट गुमाएको थियो। सुदूरपश्चिमका कप्तान दीपेन्द्रसिंह ऐरीले सर्वाधिक २७ रन बनाए। उनले २३ बलमा २ चौका प्रहार गरे। सैफ जैबले १४ बलमा १३ रन तथा विनोद भण्डारीले ८ बलमा ९ रन जोडे। अन्य ब्याटरले भने उल्लेख्य योगदान दिन सकेनन्। लुम्बिनीका बलरले सुदूरपश्चिमको ब्याटिङ लाइनअपलाई दबाबमा राखे। किशोर महतोले ४ ओभरमा २७ रन खर्चेर ४ विकेट लिए। शेर मल्लाले ३ ओभरमा १० रन दिँदै ३ विकेट हात पारे। शेड्ली भान साल्कविक र तिलक भण्डारीले समान एक–एक विकेट लिए। सुदूरपश्चिमले १२.३ ओभरमा दीपेन्द्रसिंह ऐरीको विकेट गुमाउँदा ७० रन बनाएको थियो। त्यसपछि १२.४ ओभरमा हेमन्त धामी आउट भए।