पर्सामा एक महिनामा १११ अपराधका घटना

काठमाडौं।जिल्ला प्रहरी कार्यालय पर्साले असोज महिनामा जिल्लामा भएका आपराधिक गतिविधि, अपराध अनुसन्धान तथा नियन्त्रणको प्रगति विवरण सार्वजनिक भएको छ। पर्सा प्रहरी प्रमुख प्रहरी उपरीक्षक (एसपी) पवनकुमार भट्टराईका अनुसार उक्त महिनामा विभिन्न प्रकृतिका ११ वटा अपराधका घटना दर्ता भए। शान्ति सुरक्षाको हिसाबले निकै चुनौतीपूर्ण मानिने पर्सा जिल्लामा चाडबाड, विशेष गरी बडादशैं लक्षित सुरक्षा योजना लागू गरिएको उक्त महिनामा सामाजिक अपराधका ६१ घटना भएका थिए। यस अविधमा संगठित तथा आर्थिक अपराधका १७, चोरीसम्बन्धी ९, ज्यानसम्बन्धी ८, बालबालिकासम्बन्धी ६, सवारी ज्यानसम्बन्धी २ र अन्य प्रकृतिका ४ घटना दर्ता भए। त्यस्तै, जघन्य तथा गम्भीर अपराधअन्तर्गत कर्तव्य ज्यान एक, हातहतियारसम्बन्धी दुई, बैंकिङ कसुरका १३, जुवातासका दुई र ठगीको एक घटना दर्ता भएको प्रहरी उपरीक्षक भट्टराईले बताए। यस अवधिमा चालु मुद्दाका प्रतिवादीमध्ये १२० जनालाई पक्राउ गरिएको उनले बताए। पर्सामा लागुऔषध नियन्त्रण शान्ति सुरक्षामा चुनौतीको रुपमा देखा परेको छ। उक्त महिनामा लाषुऔषधका १६ वटा मुद्दा दर्ता गरी २४ जनालाई पक्राउ गरिएको छ। पक्राउ परेकासँगको अनुसन्धान तथा कारबाहीका क्रममा ३८ किलो ५०८ ग्राम गाँजा, १७१ ग्राम ७९० मिलिग्राम ब्राउन सुगर र १४ ग्राम ६४० मिलिग्राम अफिम बरामद भएको छ। उक्त महिनामा पर्सामा ४० वटा सवारी दुर्घटना भएका थिए। दुर्घटनामा दुई जनाको मृत्यु भएको छ भने ३१ जना घाइते भएका छन्। यस अवधिमा ट्राफिक नियम उल्लङ्घन गर्ने १ हजार ३४४ वटा सवारीसाधनलाई कारबाही गरी प्रहरीले १६ लाख ३६ हजार ५०० रुपैयाँ राजस्व संकलन गरेको छ। विपद् व्यवस्थापनतर्फ १८ वटा घटना अभिलेख भएका छन्। ती घटनामा एक जनाको मृत्यु, १० जना घाइते र एक जना बेपत्ता भएका छन्। प्रहरीले १७ जनाको उद्धार गरेको विवरणमा उल्लेख छ। राजस्व चुहावट तथा भन्सार छली नियन्त्रण अभियानअन्तर्गत प्रहरीले अनुमानित ७५ लाख ४४ हजार ४९ रुपैयाँ मूल्यका सामान बरामद गरेको छ। अवैध वन पैदावार नियन्त्रणका क्रममा सात जनालाई पक्राउ गरिएको छ। उनीहरूबाट १४ वटा साइकल र ५४ क्युफिट काठ बरामद गरी ३ लाख ११ हजार ६०० रुपैयाँ जरिवाना गरिएको प्रहरीले जनाएको छ। प्रहरीले अपराध न्यूनीकरण तथा जनचेतना अभिवृद्धिका लागि प्रहरीले असोज महिनामा समुदाय केन्द्रित २२५ वटा कार्यक्रम सञ्चालन गरेको छ। ती कार्यक्रममा ४ हजार ७३८ जना लाभान्वित भएको विज्ञप्तिमा उल्लेख छ। “चाडबाडको समय भएकाले शान्ति सुरक्षा, अपराध नियन्त्रणमा केन्द्रित भएका छौँ, चाडबाडको समयमा हुन सक्ने घटनालाई लक्षित गरी जिल्लाभरि प्रहरी परिचालन र विशेष टोली खटाइएको छ,” भट्टराई भन्छन्।