पत्रकार किशोर श्रेष्ठ र हिमेश पन्तलाई सँगै राखेर छलफल गराउँदै साइबर ब्युरो

काठमाडौं । नेपाल प्रहरीको साइबर ब्युरोले राष्ट्रिय स्वतन्त्र पार्टी (रास्वपा) का केन्द्रीय सदस्य तथा कलाकार हिमेश पन्तलाई बोलाएको छ। जनआस्था साप्ताहिकका प्रधानसम्पादक किशोर श्रेष्ठविरुद्ध ब्युरोमा ठाडो उजुरी दिएपछि पन्तलाई पनि बोलाइएको हो। प्रहरीको टोलीले पत्रकार श्रेष्ठलाई नख्खुस्थित निवासबाट नियन्त्रणमा लिएर साइबर ब्युरो पुर्‍याएको छ। ब्युरो स्रोतका अनुसार पन्त पनि छलफलका लागि साइबर ब्युरेतर्फ प्रस्थान गरिसकेका छन्। समाचारको विषयलाई लिएर पन्तले हिजो श्रेष्ठविरुद्ध साइबर ब्युरोमा निवेदन दिएका थिए। श्रेष्ठले पनि पन्तविरुद्ध निवेदन दिएको जनाइएको छ। दुवै पक्षबाट निवेदन परेपछि उनीहरूलाई सँगै राखेर छलफल गराउन लागिएको ब्युरो स्रोतले जनाएको छ। पत्रकार श्रेष्ठ यसअघि साउन २७ गते काठमाडौं प्रहरी परिसरबाट पक्राउ परेका थिए। त्यसबेला प्रहरीले उनको निवासमा खानतलासी गरी ल्यापटप, कम्प्युटरलगायत विद्युतीय सामग्री नियन्त्रणमा लिएको थियो। तर, बन्दीप्रत्यक्षीकरणको रिट परेपछि सर्वोच्च अदालतले श्रेष्ठलाई थुनामुक्त गरी हाजिरी जमानी वा तारिखमा राखेर अनुसन्धान गर्न परमादेश जारी गरेको थियो। त्यसपछि उनी भदौ १ गते हिरासतबाट मुक्त भएका थिए।